Усвојувањето закон за јавното обвинителство до распуштањето на Собранието останува важна одредница за реформското досие на земјава пред мини-извештајот на Европската комисија кој е планиран за февруари и евентуалното враќање на темата за почеток на преговори пред земјите членки на ЕУ во март
Еврокомесарот за соседство и проширување Оливер Вархели идната недела, на 15 и 16 јануари, ќе дојде во посета на Северна Македонија, прва по стапувањето на новата должност, дознава „360 степени“.
Покрај запознавање со македонската политичка елита, целта на посетата на Вархели е увид во реформското досие на земјава и консултација со владините претставници за новата нацрт-методологија за пристапните преговори со ЕУ.
Вархели турка за позитивна одлука во март
Како што веќе објави „360 степени“, Европската комисија (ЕК) и комесарот Вархели работат на план чија крајна цел е почеток на преговори за членство со Северна Македонија и со Албанија во март годинава по неможноста во октомври лани да се постигне консензус во Европскиот совет.
Во функција на планот, а пред сè за да се задоволат барањата на Франција, Вархели и неговиот тим подготвуваат коригирана методологија за преговори, која би требало да ја претстават кон крајот на овој месец.
Потоа, во февруари ЕК би излегла со скратени извештаи за реформскиот напредок во Северна Македонија и во Албанија што, пак, е барање пред сè на Холандија пред евентуалното враќање на прашањето за почеток на преговори пред земјите членки на ЕУ во март.
Познато е дека владата и парламентот во Хаг сметаат дека Албанија не е подготвена за старт на преговарачкиот процес, па мини-извештајот од ЕК би требало да им го потврди ставот или да ги убеди да се премислат. Холандија е најгласна и во барањето Северна Македонија да донесе нов закон за јавно обвинителство, по можност пред одлуката за старт на преговори. Поради тоа, Вархели со македонските политички лидери ќе разговара и ќе се обиде да иницира договор и на оваа тема.
Временската рамка за идните чекори би требало да изгледа вака:
- Европската комисија до крајот на јануари изготвува нацрт-методологија за пристапните преговори и почнува консултации со земјите членки на ЕУ;
- Европската комисија во февруари објавува скратен извештај за напредокот во реформите во Северна Македонија и во Албанија;
- Советот на Европската Унија, односно земјите членки, кон крајот на март ја усвојуваат новата методологија и носат одлука за почеток на преговори со Скопје и со Тирана;
- Во календарот на ЕУ предвиден е состанок на Европскиот совет на 26 и 27 март, кога веќе ќе бидат завршени и локалните избори во Франција, кои се закажани за периодот од 15 до 22 март.
Макрон емитува позитивни сигнали
Се чини дека и францускиот претседател Емануел Макрон е подготвен на вакво сценарио, под услов да се промени методологијата за преговори. По вчерашниот работен ручек во Елисејската палата со Макрон, хрватскиот премиер Андреј Пленковиќ изјави дека се надева на позитивен сигнал уште пред самитот ЕУ – Западен Балкан во мај во Загреб.
„Сметаме дека европската перспектива за хрватското соседство нема алтернатива и затоа се радуваме што заеднички ќе го пронајдеме решението, било да станува збор за модификација на методологијата на преговорите за проширување или други конкретни потези кои Северна Македонија и Албанија може да ги направат во следниот период. Ние сакаме пред Самитот (на ЕУ и Западен Балкан во мај) во Загреб да се создаде атмосфера, така што оние земји што имаа резерви да се согласат да продолжи пристапниот процес. Тоа беше суштината на нашиот разговор на оваа тема“, рече Пленковиќ по разговорите со Макрон.
И изјавата на Макрон беше во афирмативен контекст.
„Ги споделувам вашите напори да постигнете единство на Самитот во Загреб во мај и тој да биде успешен за Европа. Франција предложи нова методологија за процесот на проширување да не биде само бирократски процес, туку вистински политички пат напред кој може да се забрза и да биде реверзибилен, кој има услови, но и конкретни придобивки за земјите кандидати“, рече Макрон.