Денес, без кворум, се овозможи да гласаат луѓе што не се членови на ЦО и кои ги криеја своите лица кога ги фотографиравме за да го евидентираме присуството, велат од општинската организација во Велес, во име на уште десетина разграноци
Десетина општински организации на владејачката ДОМ ја оспоруваат одлуката што ја донесе денеска Централниот одбор на партијата, за настап во „граѓанска коалиција“ на претстојните локални избори.
Како што информираа од велешкиот огранок на ДОМ, општинските организации во Ѓорче Петров, Гази Баба, Тетово, Охрид, Битола, Прилеп, Велес, Пробиштип, Кочани, Берово, Делчево, Лозово, Радовиш, Дојран, Кисела Вода, Аеродром и Куманово се оградуваат од, како што се посочува, нелегитимната и нестатутарната одлука за коалицирање со ЛДП и Демократскиот сојуз.
„Денес без кворум се овозможи да гласаат луѓе кои не се членови на Централниот одбор. Не беше дозволено да добиеме увид во списокот за да се сокрие нелегитимноста и нестатутарноста на “одлуката”. Ова демонстрира дека претседателката нема коалициски капацитет, бидејќи нема поддршка од 2/3 од општинските организации“,
велат од општинската организација на ДОМ во Велес.
На фејсбук страницата на ДОМ-Велес е споделено и видео, како потврда дека денешната седница на ЦО поминала во тензична атмосфера.
На денешната седница на Централниот одбор на ДОМ е донесена одлука на претстојните локални избори партијата да настапи во граѓанска коалиција со партии од центарот и граѓански активисти.
Како што соопштија од партијата, подготовките за локалните избори продолжуваат во соработка со партии со сродни програмски приоритети и со граѓански активисти. Централниот одбор за шеф на централниот изборен штаб го избра Дарко Кржовски, а за негов заменик е избран Огнен Апостолски.
Пред неколку дена, ДОМ остана со пратеник помалку, односно во законодавниот дом остана единствено партиската претседателка Маја Морачанин, откако Мирослав Богановски поднесе оставка во Собранието. Тој претходно најави дека ќе дејствува како независен пратеник во рамки на владејачкото мнозинство, а откако поднесе оставка, СДСМ доби уште еден пратеник.
Несогласувањата во партијата кулминираа пред околу еден и пол месец, кога им беше изгласана недоверба на Богдановски и на директорка на Државниот инспекторат за животна средина, со што тие ги изгубија позициите како потпретседатели и членови на Извршниот одбор на ДОМ. Тогаш ѝ беше изгласана недоверба и на Јасмина Пакашки, како член на Извршниот одбор, а како причина беше наведена нелегитимна иницијатиза за одржување вонреден партиски конгрес.