Европратениците веќе биле во Скопје, кога беше донесена одлуката за тридневна жалост поради трагедијата во Тетово, така што договорот е средбите да се одржат, но да нема јавни настапи
Известувачот на Европскиот парламент за Северна Македонија, европратеникот Илхан Ќучук и неговите колеги Андреас Шидер и Марион Валсман денеска во Собранието, во рамки на процесот „Жан Моне“, имаат средби со претседателот на парламентот Талат Џафери, како и со координаторите на пратеничките групи. Во фокусот на разговорите е Деловникот за работа на Собранието.
Според информациите од пратеничките групи, договорено е разговорите да не се најавуваат во контекст на актуелната состојба во земјата и деновите на жалост. Европратениците веќе биле во Скопје, кога беше донесена одлуката за тридневна жалост поради трагедијата во Тетово, со препорака за откажување на јавни настапи, така што договорот бил средбите да се одржат, но да нема јавни настапи, пренесува МИА,
Ќучук, Валсман и Марион се очекува освен со Џафери, да имаат средба и со потпретседателите на парламентот, Горан Мисовски и Фадил Зендели, и со генералната секретарка Цветанка Иванова, како и поединечни средби со координаторите на пратеничките групи, Јован Митрески од СДСМ, Никола Мицевски од ВМРО-ДПМНЕ, Арбер Адеми од ДУИ, Скендер Реџепи од коалицијата на АА и Алтернатива, Кастриот Реџепи од Беса, Димитар Апасиев од Левица и Мендух Тачи од ДПА. Потоа ќе следува заедничка средба на која ќе присуствуваат и други пратеници.