Сепак, ден по објавувањето на веста, шефот на работната група за ковид-19 во Европската агенција за лекови, Марко Кавалери, даде нова изјава во која кажа дека бил погрешно цитиран и дека „Астра Зенека“ нуди поголема корист отколку штета за сите возрасни групи. Италијанскиот весник „Ла стампа“, за кого Кавалери ја даде првичната изјава, го смени наслов на оригиналниот текстот, а истото го направи и светската агенција „Ројтерс“
Европската агенција за лекови (ЕМА) денеска (недела, 13 јуни 2021 год.) соопшти дека земјите треба да ја избегнуваат вакцината „Астра Зенека“ против ковид-19 и за лицата над 60 години поради можност од ретка појава на згрутчување на крвта, објави Ројтерс.
ЕМА смета дека „Астра Зенека“ е безбедна вакцина за сите возрасни групи, но неколку земји-членки на ЕУ престанаа да ја користат за младите или ја ограничуваат на лица на возраст од 50 до 65 години.
Оваа одлука ја донесоа земјите по евидентираните случаи на згрутчување на крвта кај помладата популација.
Лидерот на работната група на ЕМА за ковид-19, Марко Кавалери, изјави дека останува нивниот став дека користа од вакцината е поголема од можните ризици.
„Но, бидејќи инфекцијата се смирува и со оглед на тоа што младите се помалку изложени на ризици поврзани со ковид-19, веруваме дека ќе биде подобро за нив да користат вакцини развиени со mRNA технологија, како што се ‘Модерна’ или ‘Фајзер”,
изјави Кавалери.
Тој потврди дека препораката важи и за лицата постари од 60 години, и дека Франција и Германија, кои имаат на располагање повеќе видови на вакцини, одлучија да ја избегнат „Астра Зенека“ за лицата над 60 години и претпочитаат да им нудат вакцини со mRNA.
Погрешно цитиран
Денеска, сепак, Кавалери даде нова изјава бидејќи, како што вели, бил погрешно цитиран од весникот „Ла Стампа“ што пак беше пренесено од повеќе медиуми меѓу кои и „Ројтерс“. И двата медиуми ги сменија текстовите и насловите, па сега пренесуваат дека вакцината на „Астра Зенека“, според Кавалери, нуди повеќе корист отколку штетни последици и дека со тоа е препорачлива за сите воразни групи.
*овој текст е дополнет на 14 јуни 2021 година, со цел точно информирање на јавноста по корекциите на „Ла Стампа“ и „Ројтерс“