Уставниот суд е последната правна инстанца во Србија откако Републичката изборна комисија ги објави конечните резултати од изборите на 12 јануари, а сите приговори на опозициската коалиција беа отфрлени
Пред зградата на Уставниот суд во центарот на Белград вечерва започна нов протест на опозициската коалиција „Србија против насилството“ поради, како што се тврди, кражбата на гласовите на декемвриските избори во Србија.
Тоа е последната правна инстанца во Србија откако Републичката изборна комисија ги објави конечните резултати од изборите на 12 јануари, а сите приговори на опозициската коалиција беа отфрлени.
„Србија против насилството“ на 18 јануари поднесе барање за поништување на изборите во Белград.
Уставниот суд по правило нема рокови за донесување на одлуките.
Сообраќајот е прекинат на булеварот Краља Александра, каде што е седиштето на Уставниот суд, а граѓаните сè уште пристигнуваат.
Насобраните со исвиркување го изразија своето незадоволство од однесувањето на власта на декемвриските избори, а носеа и пароли дека изборите се украдени.
Камион со озвучување беше поставен пред седиштето на Уставниот суд, од каде што се очекува да зборуваат говорниците на протестот.
Коалицијата „Србија против насилството“, која бара повторување на републичките и белградските избори одржани на 17 декември минатата година, најави и одржување напротестна поворка до блиското седиште на Радио-телевизија на Србија (РТС), која според опозицијата, не известува објективно и во корист на граѓаните, туку исклучиво ја пропагира власта.
Барањата се упатени до јавниот сервис кој го плаќаат сите граѓани, РТС да известува за „докажана изборна кражба и нарушување на волјата на народот на декемвриските избори“.
Коалицијата „Србија против насилството“ ја сочинуваат Партијата за слобода и правда, Демократската партија, Народното движење на Србија, Еколошкото востание, Зелено-левичарскиот фронт, Србија центар, партијата Заедно, Движењето на слободни граѓани, Движење за револуција, синдикатот „Слога“ и движењето Ново лице на Србија.
Протести на српската опозиција започнаа на 18 декември откако матичната партија на претседателот Александар Вучиќ, СНС, ден претходно прогласи целосна победа на изборите, за кои опозицијата тврди оти се украдени од власта.
Покрај републичките и покраинските избори, на 17 декември се одржаа и локални избори во 65 градови и општини, меѓу кои и Белград.