За петте испразнети места конкурираа петмината обвинители на кои им истече мандатот, но се пријави уште пет други обвинители
Денеска Советот на јавни обвинители треба да одржи продолжение на седницата која ја започна пред една недела, а на која треба да се изберат пет обвинители во Обвинителството за гонење организиран криминал и корупција со кое раководи Вилма Русковска. За овие места во трка се 10 обвинители.
Ова ќе биде втор обид, откако претходниот четврток во Советот немаше кворум поради отсуството на тројца членови: државниот обвинител Љубомир Јовески, како и членовите Љупчо Ивановски и Иџет Мемети.
Изборот треба да се случи откако на крајот на јануари истекоа мандатите на пет обвинители. Советот донесе одлука да распише конкурс на седница на 15 ноември лани. Изборот досега не се случи со оглед дека се чекаше оценувањето за кое дел од обвинителите кои конкурираа поднесуваа приговори, кои Советот ги прифати, па имаше ново оценување. Откако И за второто оценување имаше приговори чиј рок истече кон крајот на февруари годинава, по што беше закажана седница за избор.
Кои обвинители конкурираа?
Од 10 обвинители кои се пријавија на конкурсот петмина се оние на кои им истече мандатот и сега бараат нов: Ивана Трајчева, Марија Ѓоргева, Валентина Беслимовска, Сузана Мирческа – Кузмановска и Енѓулуше Кадриу – Леши.
Останатите петмина, пак, се: Златко Биковски, Елизабета Јосифовска, Наташа Сарамандова, Имран Османи и Арсим Адеми.
Повеќето од имињата досега се познати во јавноста, најмногу поради предметите кои ги водеа, а во кои се опфатени јавни функционери.
Ивана Трајчева, на пример, е обвинителката која ја водеше истрагата и го застапува предметот „Софтвери“ против поранешниот генерален секретар на Владата, Драги Рашковски и уште шест други лица. Судскиот процес започна минатата недела, но поради истечениот мандат воведните зборови на рочиштето ги даваше Вилма Рускоска. Од другите попознатите предмети во јавноста, таа настапува како обвинителка и во случајот „Меѓународен сојуз“ против Бојан Јовановски – Боки 13, Јасна Ерцеговиќ, Фросина Ременски, Христина Блажевска и Миле Јовановски. Овој предмет е пред завршница пред првостепениот суд, но и тука од иста причина како и со воведните зборови во „Софтвери“, Трајчева вчера не можеше да ги даде завршните зборови, па тоа го направи обвинителот Трајче Пеливанов, кој по истекот на нејзиниот мандат изминатите неколку рочишта го застапуваше обвинението. Трајчева често во судница ги застапуваше и случаите за настаните од 27 април 2017 година во Собранието, како и предметот „Шпански скали“.
Еден од најатрактивните предмети за јавноста кои ги водеше нејзината колешка Валентина Беслимовска, која исто така бара нов мандат, е случајот „Поткуп“ против поранешниот премиер Зоран Заев. Беслимовска на судењето пред околу четири години рече дека во истрагата и од исказот на главниот сведок, било утврдено дека Заев не зел пари од струмичкиот бизнисмен, па направи преквалификација – наместо за примање поткуп, побара тогашниот премиер да биде осуден за барање поткуп. Промената на обвинението предвидуваше и помала затворска казна, но и снимките од ПИ-мерките да не се изведуваат како докази. Исто така, од тие причини судечкиот совет во кој беа судиите Дарко Тодоровски и Добрила Кацарска со тројца поротници, се намали, па Тодоровски сам ја донесе пресудата која беше ослободителна.
За Марија Ѓоргева се пишуваше во медиумите кога пред четири години беше избрана да гони организиран криминал и корупција со оглед дека е внука на Коле Штериев, кој е член на Советот на јавни обвинители, но гласаше „воздржано“. Таа беше и меѓу првичниот тим што го избра Катица Јанева во СЈО, но по само неколку месеци Јанева им се „заблагодари“ и на неа и на обвинителката Лејла Кадриу.
Меѓу конкурентите, пак, има обвинителка која беше и остана дел од СЈО до неговото згаснување. Станува збор за Елизабета Јосифоска која сега е актуелна обвинителка во гостиварското обвинителство, а покрај застапувањето на предмети во СЈО, ѝ беше и заменичка на Катица Јанева.
Кандидатурата на нејзиниот колега од Гостивар, Арсим Адеми, да се приклучи на тимот на Русковска деновиве најмногу ја брануваше јавноста. Тој е обвинителот кој ја договори спогодбата со Зоран Милески – Кичеец за сообраќајката со смртни последици во септември минатата година на патот Гостивар-Кичево. Кичеец кој призна вина во „Рекет“, сообраќајката ја направи додека беше на отпуст од издржување на затворската казна во затворот во Струга, која дотогаш ја издржуваше во одделението од отворен тип. За обвинителот Адеми, од Антикорупциската комисија обелоденија дека имаат отворено три предмети, меѓу кои и за спогодбата за сообраќајката.
Обвинителот од Берово, Златко Биковски, претходно беше в.д. шеф токму на Обвинителството за гонење на организиран криминал и корупција, откако Јован Илиевски кој беше на позицијата замина како судија во Стразбур. Тој е познат во јавноста по тоа што го водеше случајот „Пуч“, а беше и еден од обвинителите против кого се водеше дисциплинска постапка за непостапување откако се случи упадот во Собранието на 27 април 2017 година. Тој во 2019 конкурираше да биде член и на Антикорупциската комисија.
Во јуни истекува мандатот на уште три обвинителки од тимот на Русковска
По истекот на мандатот на петмината обвинители, за чии испразнети места денеска треба да се одржи изборот, Обвинителството за гонење организиран криминал и корупција официјално остана со осум обвинители.
Но, на тројца членови на тимот, како што кажа претседателот на Советот на јавни обвинители Антонио Јолески минатата недела, мандатот ќе им истече во јуни годинава, па се очекува за околу еден месец да се распише оглас и за тие три места што треба да се испразнат.
Ако се погледнат имињата објавени на веб-страницата на обвинителството, може да се заклучи дека станува збор за обвинителките Гордана Смаќоска, Маја Конеска и Милица Гаврилова, со оглед дека останатите пет обвинители од вкупно осум кои имаат актуелен мандат, беа избрани во април 2022, а тоа се: Артан Ајро, Трајче Пеливанов, Катерина Коларевиќ, Лиле Стефанова и Наташа Поп Трајкова.