Претседателката на ДКСК очекува судскиот и обвинителскиот совет да преземат соодветни мерки и да се позанимаваат со постапувањето на обвинителите и судиите, особено, како што вели таа, по последниот случај со условната казна за Зоран Милески-Кичеец за сообраќајката во која загина гостиварец
Министерот денеска најави дека се работи на воведување ново кривично дело – безобѕирно управување со моторно возило, за кое во случај на смртни последици минималната казна ќе биде четири години затвор
Државната комисија за спречување на корупцијата (ДКСК) денеска пред почетокот на одржувањето на седницата изрази сериозна загриженост за изрекувањето благи казни за сторени тешки кривични дела, особено во делот на безбедноста на луѓето и имотот во сообраќајот. Антикорупционерите побараа надлежните институции да постапат во рамките на своите надлежности и да преземат соодветни мерки по ова прашање.
„Сè почесто, како што бевме сведоци, има една правосудна пракса на изрекување благи казни за сторени тешки кривични дела особено во делот на безбедноста на луѓето и имотот во сообраќајот и тоа со тешки последици. ДКСК јавно ја изразува својата сериозна загриженост и ги повикува надлежните органи, а тоа се Советот на јавни обвинители и Судскиот совет да постапат во рамките на своите надлежности и да преземат соодветни мерки. Очекуваме овие органи сериозно да се позанимаваат со постапувањето на обвинителите и судиите, особено со последниот случај за обвинетиот Кичеец каде што е изречена преблага казна по спроведеното спогодување на обвинителот со обвинетиот и тоа под законскиот минимум за тешко кривично дело со смртни последици“,
рече претседателката на ДКСК Билјана Ивановска.
Ова, нагласи таа, дотолку повеќе што во Стратегијата за национална за борба против корупција неказнивоста е препознаена како еден од клучните ризични фактори за корупција во правосудството.
Покрај случајот со Кичеец, деновиве актуелна е и пресудата со условна казна за сообраќајка во Охрид во која две момчиња загинаа, а три девојки беа тешко повредени. За оваа условна казна вчера се огласи и министерот за правда Бојан Маричиќ, кој рече дека не е рамнодушен и побара Судскиот совет будно да го следи случајот.
Тој денеска, пак, изјави дека иницира дебата во рамките на работна група во Министерството за правда токму за подобрување на законските решенија за ублажување на казните и елиминирање на можните злоупотреби во ова насока, како и анализа на примената на постојните одредби од страна на судовите и Јавното обвинителство во однос на делата поврзани со загрозување на безбедноста во сообраќајот.
Маричиќ најави и дека се работи на воведување ново кривично дело – безобѕирно управување со моторно возило.
„Сакам да ја информирам јавноста дека во рамките на Работната група на Министерството за правда за изготвување нов Кривичниот законик вградуваме ново кривично дело – безобѕирно управување со моторно возило за што се пропишува затворска казна и до 3 години, а доколку има смртни последици казната најмалку четири години затвор“,
изјави Маричиќ одговарајќи на новинарско прашање.