Ниту еден пратеник или вработен во собраниските служби нема да оди во изолација поради ковид-19 откако беше соопштено дека двајца пратеници се позитивни на вирусот.
Директорот на Центарот за јавно здравје (ЦЈЗ) – Скопје Александар Стојанов, за МИА, ја потврдил информацијата и рекол дека во Собранието се почитуваат сите мерки и препораки за превенција од ковид-19.
Во моментов, двајца пратеници се позитивни на вирусот. Позитивен на ковид-19 е пратеникот од ДУИ, Исмаил Јахоски, кој е на Инфективната клиника. Тој е во добра состојба. Коронавирусот без симптоми го поминува и пратеникот на СДСМ од Охрид, Лазе Таневски, кој е во изолација.
И премиерот Зоран Заев и министерот за здравство Венко Филипче денеска изјавија дека очекуваат пратениците да работат од дома и да заседаваат онлајн.
Од најголемата опозициска партија ВМРО-ДПМНЕ, пак, денеска уште еднаш го повторија ставот дека се против онлајн работа на парламентот бидејќи според нив тоа е спротивно на Уставот.