Како што посочуваат од Влада, преку посветена работа на сите министерства и тимовите во работните групи, од започнувањето на Иницијативата, до денеска, направен е голем напредок во делот на соработката меѓу трите држави во областа на земјоделството
Министерот за земјоделство, шумарство и водостопанство Љупчо Николовски во рамки на дводневниот самит на „Отворен Балкан“ во Охрид, беше домаќин на министрите за земјоделство на Србија и Албанија, Бранислав Недимовиќ и Фрида Крифца. Делегации на трите држави, предводени од министрите за земјоделство, одржаа работна средба на техничко ниво каде се разговараше за забрзување на процесот за усогласување на ветеринарните сертификати со цел олеснета размена на живи животни и производи од животинско потекло помеѓу трите држави од „Отворен Балкан“, информираат од Влада.
На средбата, како што се вели во соопштението на владината прес-служба, договорено е дека Агенцијата за храна и ветеринарство во рок од 15 дена треба да направи измени во Правилникот кој го регулира извозот и увоз на живи животни и производи од животинско потекло, со цел непречена трговија помеѓу државите.
„Отворен Балкан“ е симбол на нашата меѓусебна доверба и почит. Преку „Отворен Балкан“ овозможуваме достоинствен живот денес, но и сигурна иднина, за граѓаните на трите држави. Меѓусебната почит и реципроцитет во односите меѓу трите земји, значи заеднички да одиме напред, помагајќи си меѓусебно онаму каде што е најпотребно за секој од нас. Денешните здравствени и економски кризи, со кои се соочени нашите земји, но и светот, се уште една потврда за потребата и придобивките од иницијативата „Отворен Балкан“. Благодарение на успешната соработка, преку оваа иницијатива заеднички, успеавме да обезбедиме стабилно снабдување со основните прехранбени производи меѓу нашите држави, директно помагајќи им на граѓаните“,
истакна министерот Николовски во своето обраќање.
Како што посочуваат од Владата, преку посветена работа на сите министерства и тимовите во работните групи, од започнувањето на Иницијативата, до денеска, направен е голем напредок во делот на соработката меѓу трите држави во областа на земјоделството.
„Зелените коридори на граничните премини за земјите од „Отворен Балкан“ веќе функционираат, што претставува големо олеснување за економските оператори. Признати во сите три земји се фитосанитарните сертификати и трговијата со растенија и растителни производи се одвива непречено“,
се вели во владиното соопштение.
Министерот Николовски упатил и благодарност до двајцата министри, за соработката помеѓу државите во овие кризни моменти и заедничката посветеност кон полесно надминување на кризата.