Планот, вели пратеникот и потпретседател на ВМРО-ДПМНЕ, Александар Николоски, се темели на три столба – национален, политички и финансиски, а сите три, како што додаде, водат до почеток и успешно водење на преговорите до ЕУ
Уште еднаш повторувајќи го ставот на партијата, оти не планира да поддржи уставни измени, барем не во овој парламентарен состав, пратеникот и потпретседател на ВМРО-ДПМНЕ, Александар Николоски, вели дека опозициската партија има план како да ја однесе земјава до преговорите за членство во Европската Унија.
Планот, вели Николоски, се темели на три столба – национален, политички и финансиски, а сите три, како што додаде, водат до почеток и успешно водење на преговорите до ЕУ.
„Националниот се однесува на национално издигнување на македонскиот народ, политичкиот е во насока на заштита на македонскиот идентитет и македонскиот јазик и финансискиот е пред сè напредок и бенефит на граѓаните во она што ги интересира, а тоа е подобар животен стандард“,
посочи Николоски во гостување на ТВ Алфа.
Тој додаде дека за реализација на овие столба потребно е прво да се случат предвремени парламентарни избори на кои партијата детално ќе ги презентира овие позиции и ќе направи детална презентација на целокупната идеја.
„Јасно дека една од причините поради која Македонија не почнува почеток на преговорите е тоа што Бугарија се противи на таа работа, но втората причина е високото ниво на организиран криминал и корупција. Постојат неколку исклучително моќни земји членки на ЕУ кои се против почеток на преговори на Македонија со Унијата не заради бугарските условувања, не заради грчките условувања од претходно, туку затоа што сметаат дека во Македонија има превисоко ниво на криминал и корупција – истото што го гледа и смета народот“,
додаде Николоски потенцирајќи дека ниедна од овие држави не врши никаков притисок на Бугарија.
Нагласи и дека кога земјава би се изборила со криминалот и корупцијата, тогаш би се смениле работите.