Јас едно зборувам, тие друго спинуваат, вели потпретседателот на ВМРО-ДПМНЕ и носител на кандидатската листа во изборната единица 4, Александар Николоски, во објава на Фејсбук откако денеска беше објавена нова снимка од негов разговор со Миле Јанакиески.
„Го гледам Заев свесен дека ќе губи пласира лажни вести преку порталите што му се блиски. Јас едно зборувам тие друго спинуваат. Очај! Им се смеат луѓето. Белото не може да е црно. Ама и жално е на што паднаа. Голем пораз те чека Заев и во четворката и во цела Македонија! А потоа одговорност. Знам дека стравот е голем и затоа очајот е голем. И да те повикам уште еднаш – дали си во состојба да го докажеш потеклото на сопствениот капитал и капиталот на твоето семејство?“,
пишува Николоски во реакцијата.
Во денешната снимка се слуша како Николоски му вели на Јанакиески да не се чепкаат проекти на Нефи Усеини во Охрид, кого го нарекува „бандит“ и посочува дека тоа е дел од договор за избори.
Аудиоснимка се појави и вчера, во која исто така се слушаа гласовите на Николоски и Јанакиески. Во таа „бомба“, Николоски добива задолжение од Миле Јанакиески да организира сообраќајка во близина на Охрид за да се спречат гласачи Албанци да гласаат на локалните избори во 2013 година.