Александар Николоски добива задолжение од Миле Јанакиески да организира сообраќајка во близина на Охрид за да се спречат гласачи Албанци да гласаат на локалните избори во 2013 година.
Нов аудиоразговор денеска е објавен на јутјуб-каналот „Обнова на РЕЖИМОТ“ – во него се слушаат гласовите на актуелниот потпретседател на ВМРО-ДПМНЕ, Александар Николоски, кој е и носител на кандидатската листа во изборната единица 4, и поранешниот министер за транспорт и врски Миле Јанакиески.
Разговорот во снимката е следен:
Николоски: Кажи шефе!
Јанакиески: Александар, слушај сеа. Идеја… Со Горде зборев. Има два авиони Шиптари, слетуваат сега во четири и четири и пол. Да напрајте една сообраќајна несреќа кај Пресека, ситна? Да се пресече коли, па МВР увид, ваму-таму. Трактор да се испреврти нешто, сериозно ова ти зборам!
Николоски: Немам ништо против. Нека им јави Горде на овие нејзините од МВР, ќе се организира таа работа, не ми е проблем.
Јанакиески: Вие не можи од членство некој да излези да чукни, трактор со кола, па пополека?
Николоски: А да му речам на Илија од Кичево да организира?
Јанакиески: Јави му се на Иле од Кичево, ама негде накај Охрид да се напраи. Ајде!
Николоски: Ок. Кога слетува тој авионот?
Јанакиески: Во четири, четири и пол.
Претходните денови, пак, на истиот јутјуб-канал беа објавувани аудиоснимки од Јанакиески со Игор Јанушев, кој е генерален секретар на ВМРО-ДПМНЕ и носител на кандидатската листа во изборната единица 3.
Вчера се појавија 3 аудиоснимки од Јанушев и Јанакиески. Тие се однесуваа на исклучување на лифтови и струја на денот на гласање. Реплики за исклучување лифтови и струја, како и за попречување на патот со инсценирана сообраќајка на денот на гласање, беа објавувани уште во периодот 2015-2016 година, на прес-конференциите на СДСМ на кои се пласираа „бомби“ за изборни нерегуларности, но тогаш Јанушев и Николоски не беа дел од врвот на ВМРО-ДПМНЕ.
Во една од вчерашните снимки Јанушев, во разговор со Јанакиески, спомнува извесен Милош кој рекол дека му е страв дека ако ги исклучат лифтовите „потоа и нашите нема да можам да ги изнесам без лифт“. Сепак, Јанакиески дава препорака: „Нека ги е…т брат“.
Исклучувањето лифтови се поврзуваше со локалните избори во 2013 година и гласањето во скопски Капиштец кој спаѓа во Центар – една од ретките општини во кои СДСМ, по неколку изнудени прегласувања, освои градоначалничко место и мнозинство во Советот.
Во втората снимка објавена вчера Јанушев и Јанакиески се договараат да пријават дефект на струја во точно одредено време и на конкретни локации. Јанушев му соопштува на Јанакиески дека ги пратил адресите кај извесна Рада, за да ги препрати кај Спиро.
„Утре меѓу 6 и 7 да се јават во ЕВН. Да пријават дефект, сега ќе ти го пратам бројот“,
му вели Јанакиески на Јанушев.
Во третата снимка, пак, Јанакиески го прашува Јанушев: „Кој ти е заклучокот за изборите“?
„Дека не не сакаат. И Владо не го сакаат. А општинската ни е тапа“,
одговара Јанушев, веројатно мислејќи на Владимир Тодоровиќ, кој во 2013 година беше кандидат на ВМРО-ДПМНЕ за втор мандат како градоначалник на Центар, ама изгуби од Андреј Жерновски.
Претходни денови имаше и други снимки од разговори помеѓу Јанушев и Јанакиески. Тие упатуваат на тоа дека сегашниот генерален секретар на ВМРО-ДПМНЕ и носител во „тројката“ бил во директна координација со Јанакиески во предизборните периоди. Во тој контекст во понеделникот беа објавени снимки во кои двајцата договараат чартер летови, веројатно за наши иселеници, од Италија и Швајцарија.
Претходно имаше „бомби“ во кои двајцата разговараа за списоци на гласачи од „Телеком“ и за тоа каде треба да бидат сместени партиски членови и лаптопи за денот на изборите.
На 3 јули се објави снимка во која Јанушев и Јанакиески зборуваат за списоци со гласачи, па споменуваат одреден список означен како МИОА, како и снимка во која генералниот секретар се жали дека списоците кои му се пратени се катастрофа и се мапирани само по избирачко место.