Потпретседателот на ВМРО-ДПМНЕ и пратеник, Александар Николоски, вели дека од тројцата кандидати за комесар за човекови права на Европа побарал почитување на правата на Македонците во Бугарија и Грција за време Комисијата за правни прашања и човекови права на Парламентарното собрание на Советот на Европа во Париз.
Тој вели дека својата поддршка ќе ја даде за кандидатот кој, меѓу другото, ќе се заложи за спроведување на пресудите кои се поврзани директно со правата на Македонците во делот на самоидентификација, во делот на правото на здружување и во делот на употребата на мајчиниот јазик во процесот на образование во Бугарија.
„Тројцата ги прашав истото прашање со цел да одлучам кого од овие три кандидати би поддржал, а тоа е што прво ќе направат, за заштита на човековите и малцински права на македонското малцинство во Бугарија, во Грција имајќи предвид дека правата на овие две малцинства се сериозно загрозени, односно дека Македонците во Бугарија и Грција не можат да го користат својот мајчин јазик во образованието, немаат права да се здружуваат ниту во здруженија на граѓани ниту во политички партии, уште помалку имаат право да се искажуваат себеси како Македонци. Исто така, тројцата ги прашав и што ќе направат за спроведување на пресудите на Европскиот суд за човекови права во Стразбур кои се однесуваат на Македонците во Бугарија, пресуди кои се во директна надлежност на комесарот за човекови права во Европа“,
вели Николоски.
Тројцата кандидати се од Бугарија, Австрија и Ирска.
Николоски додава дека ќе продолжи со силен притисок врз овие три кандидати до изборот на еден од нив на јануарската сесија на Парламентарното собрание во Стразбур со цел правата на Македонците и во Бугарија и во Грција да бидат заштитени согласно Европската конвенција за човекови права како и Повелбата за малцински јазици и Повелбата за заштита на националните малцинства кои всушност ги има донесено Советот на Европа, а ги има поддржано и Европската Унија.
Тој оценува дека заштитата на основните човекови права треба да е приоритет број еден во следниот период и според него македонската влада треба силно да се ангажира, а не само ВМРО-ДПМНЕ како опозиција, вели Николоски.