Меѓу пријавените се в.д. директорот, членови на комисии за јавни набавки, контролори и одобрувачи од Управата за хидрометеоролошки работи (УХМР) Скопје, како и одговорни лица во две правни лица од Скопје и Битола
Девет физички и едно правно лице добија кривични пријави поради сомнение за сторени кривични дела злоупотреба на службената положба и овластување и фалсификување исправа.
Меѓу пријавените се в.д. директорот, членови на комисии за јавни набавки, контролори и одобрувачи од Управата за хидрометеоролошки работи (УХМР) Скопје, како и одговорни лица во две правни лица од Скопје и Битола.
Според МВР, првопријавениот И.Т. (53), во својство на в.д. директор на УХМР, постапил спротивно на Етичкиот кодекс на Светската метеоролошка организација (СМО). Тој донел две посебни одлуки за набавка за ист настан и покрај тоа што знаел дека се процедурално неисправни. Игнорирајќи го фактот дека понудите не ги исполнувале условите и дека не биле понудени цени за сите ставки, тој склучил договори со кои на правното лице од Скопје му овозможил противправна имотна корист од 29 244 786 денари или околу 475 илјади евра. Со правното лице од Битола, пак, склучил договор за печатење промотивен работен материјал и ситен инвентар и му овозможил корист од 782 050 денари или околу 12 715 евра.
Во извршувањето на незаконските постапки учествувале и членовите на Комисијата за набавки Р.Б. (61), Н.А. (63) и Ј.М. (58), кои прифатиле задоцнета и некомплетна понуда од скопската фирма и технички неисправна понуда од фирмата од Битола, без да изготват соодветни записници и извештаи и дале предлог за избор на најповолна понуда врз основа на цената, иако за сите ставки од техничката спецификација економскиот оператор не понудил цена и не може да се одбере најниска понуда без целосно пополнета техничка спецификација.
Во кривичната пријава опфатени се и лица задолжени за подготовка и контрола на документацијата. А.С. (43) како изготвувач на одлуката за набавка, заедно со одобрувачите С.А.М. (64) и С.С. (61), изготвиле и потпишале нецелосна одлука, а потоа пуштиле во реализација фактура со измислени коефициенти и без прилог-докази.
Контролорката во Секторот за финансии Л.К. (64) пропуштила да изврши задолжителна суштинска и претходна финансиска контрола, со што извршила свесна верификација на невистинити финансиски податоци и овозможила неоснована исплата.
Исто така, кривичната пријава опфаќа и одговорни лица од приватните фирми – В.Х. (48), управител на правното лице од Битола, како и починатиот С.С., поранешен управител на правното лице од Скопје, кои доставувале неисправни понуди и фактури со невистинита содржина кои не одговарале на реално извршените услуги.