Демократската унија за интеграција денеска предложи дневен ред за утрешната зедничка средба со лидерите на партиите од албанскиот политички блок која ја планира претседателот на партијата Али Ахмети.
Од ДУИ велат дека дневниот ред може да биде дополнет и изменет со предлози од сите учесници за време на заедничката средба. Тие го предлагат следниот формат за учество: претседател плус двајца соработници.
„За состанокот в четврток, со почеток во 12:00 часот, ја предлагаме следната агенда: статус на реализација на определбите од заедничката декларација во претходниот мандат, евалуација на предвремените парламентарни избори од 15 јули 2020 година, формирање меѓупартиски совет во согласност со заедничката декларација и утврдување на рокови за реализација на заедничките цели и разно“,
се вели во партиското соопштение.
Демократската унија за интеграција, се посочува во партиското соопштение, останува достапна и отворена за натамошни средби во текот на следната недела или на кој било иден датум за кој оставаат простор да се договорат на утрешната средба.
Нејасно е со кого утре Ахмети ќе ја одржи средбата кога претседателот на Беса, Билал Касами, вчера објави дека нема да учествува, а денеска истото го направија и лидерите на Алијанса за Албанците и Алтернатива, Зијадин Села и Африм Гаши, кои се за средба но, како што рекоа од понеделник. Само лидерот на ДПА, Мендух Тачи, сè уште не се изјасни.
И покрај ова, од ДУИ им се заблагодаруваат на сите албански парламентарни партии за коректната комуникација, потврдниот одговор и добронамерните предлози за оваа, како што велат, многу важна средба поздравена од сите Албанци.