Во изолација ќе одат само членовите на семејството на пратеничката на СДСМ, која е позитивна на ковид-19
Ниту еден пратеник или службеник од Собранието нема да оди во изолација поради контакт со пратеничката Славјанка Петровска, која пред два дена објави на својот профил на Фејсбук дека е позитивна на коронавирусот.
„Петровска немала ризични контакти во Собранието. Во изолација ќе одат само членовите на нејзиното семејство“,
изјави за МИА директорот на Центарот за јавно здравје Александар Стојанов.
Во Собранието, како што посочи тој, се почитуваат сите мерки за заштита и превенција од коронавирусот.
И колегите на Петровска од пратеничката група на СДСМ велат дека се почитуваат сите мерки – носење заштитна маска, држење дистанца. Тие велат дека при влез во пленарната сала се дезинфицираат и таму се постојано со маски.
Пред Петровска, уште неколку други пратеници беа позитивни на ковид-19, но сите се вратени на работните места.
Пред да стане пратеничка, Петровска беше дополнителна заменик-министерка во техничката влада. На таа функција дојде од позицијата шефица на кабинетот на министерот за внатрешни работи Оливер Спасовски, кој тогаш застана на чело на владиниот кабинет, кој беше избран да ги организира годинешниве парламентарни избори, но неочекувано се најде во вителот на епидемијата со ковид-19.
Пред два дена Спасовски бил хоспитализиран на Инфективната клиника откако во понеделникот објави дека е позитивен на ковид-19.