Организациите за заштита на човековите права низ светот, меѓу нив и македонската Асоцијација за здравствена едукација и истражување ХЕРА, потпишаа повик до владите ширум Европа, да обезбедат сигурен и брз пристап до абортус за време на пандемијата со коронавирусот, јави дописничката на МИА од Брисел.
„Амнести интернешнл“ и десетици невладини организации потсетуваат дека во оваа здравствена криза има многубројни пречки за пристап до безбеден прекин на бременоста.
„Европските влади мораат итно да дејствуваат за да обезбедат сигурен и брз пристап до абортусот за време на пандемијата од ковид-19, тие мора брзо да ги отстранат сите непотребни медицински пречки кои го отежнуваат пристапот до абортусот и да им овозможат на жените пристап до ран абортус од дома“,
изјави Леа Хоктор, од Центарот за репродуктивни права.
Организациите бараат да се признае прекинот на бременоста како суштинска здравствена потреба, и потсетуваат дека поради здравствената криза голем број болници ги сведоа своите здравствени услуги на минимум или го пренасочија персоналот, и во многу места пристапот до нормални клинички услуги е „екстремно тежок“.
Невладините особено ја критикуваат полската влада која велат носи драконски закон за забрана на абортусот користејќи го фактот што вниманието на јавноста е свртено кон други теми.
Потсетуваат дека во шест европски земји абортусот е сѐ уште забранет или ограничен поради административни бариери и доктори кои одбиваат да вршат прекин на бременост поради лично убедување, а во тие земји жените се приморани да патуваат во странство за да добијат абортус, што во овие околности на карантин е речиси невозможно.