Во интервју за британскиот „Сандеј тајмс“, Офир Фалк, главниот советник за надворешна политика на Нетанјаху, рече дека предлогот на Бајден е „договор за кој се согласивме – не е добар договор, но навистина ни е грижа за ослободувањето на сите заложници“
Советникот на израелскиот премиер Бенјамин Нетанјаху потврди дека Израел го прифатил рамковниот договор за ставање крај на војната во Газа што сега го предлага американскиот претседател Џо Бајден, иако тој рече дека има мани и треба многу да се работи на него.
Во интервју за британскиот „Сандеј тајмс“, Офир Фалк, главниот советник за надворешна политика на Нетанјаху, рече дека предлогот на Бајден е „договор за кој се согласивме – не е добар договор, но навистина ни е грижа за ослободувањето на сите заложници“.
Израел инсистира на уништување на Хамас
„Има многу детали што треба да се разработат“,
рече тој додавајќи дека условите на Израел, вклучително и ослободувањето на заложниците и уништувањето на Хамас како геноцидна терористичка организација, не се променети.
Бајден, чија цврста поддршка за израелската офанзива отстапи место за отворена осуда на операцијата која резултира со големи цивилни жртви, во петокот го претстави својот план во три фази кој ѝ го предаде на владата на Нетанјаху со цел да се стави крај на војната.
„Првата фаза од планот предвидува прекин на огнот и враќање на дел од заложниците кои ги држи Хамас, по што во втората фаза страните ќе преговараат за траен прекин на непријателствата, а потоа ќе бидат ослободени преостанатите заложници“,
рече Бајден.
„Без Хамас на власт“
Бајден веќе даде неколку предлози за прекин на огнот во последниве месеци, секој со слични рамки на предлогот што го претстави во петокот, но сите пропаднаа. Во февруари тој рече дека Израел се согласил да ги запре операциите до Рамазан, светиот муслимански месец кој започна на 10 март, но такво примирје никогаш не беше спроведено.
Една точка на спор е инсистирањето на Израел дека ќе разговара за привремен прекин на огнот додека Хамас не биде уништен. Хамас, кој не покажува знаци на повлекување, вели дека ќе ги ослободи заложниците само ако има траен крај на војната.
Во својот говор, Бајден рече дека неговиот последен предлог носи подобар „ден после“ во Газа без Хамас на власт. Тој не појасни како тоа треба да се постигне, но нагласи дека има низа детали за кои треба да се разговара за да се премине од првата фаза во втората фаза.