„Апсолутно мора да се провери статиката бидејќи се работи за сериозен пожар кој траеше многу долго“, вели професорот и декан на Градежниот факултет, Горан Макрковски, за пожарот во зградата во скопски Чаир кој беше активен повеќе од 30 часа
Пред станарите воопшто да се вратат во становите во опожарената зграда во Чаир, неопходно е да се направи сериозна анализа на статиката и конструктивните елементи на објектот, вели во изјава за МИА професорот и декан на Градежниот факултет во Скопје, Горан Марковски.
„Апсолутно мора да се провери статиката бидејќи се работи за сериозен пожар кој траеше многу долго. Мора да се направи сериозна анализа на конструктивните елементи на зградата и да се утврди квалитетот на бетонот и на арматурните делови“,
вели професорот Марковски.
Пожарот во зградата на улица „Серава“ во скопски Чаир избувна ноќта помеѓу 1 и 2 октомври и беше активен повеќе од 30 часа. Целосно е изгаснат утринава околу 9:30 часот.
Од Центарот за управување со кризи вчера информираа за отежнато гасење на пожарот поради големата количина чад и високата температура во подрумите на зградата во кои била складирана поголема количина запаливи материјали. Поради тоа, интервенираше и специјално противпожарно возило на Армијата.
Во огнените јазици беа зафатени подрумските простории на објектот, а станарите беа евакуирани преку покривот на зградата со посебни скали на противпожарно возило. Поради вдишување чад, лекарска помош побараа 40-ина лица, а дел од нив беа задржани на скопските клиники.