Според објавите на социјалните мрежи на локалните активисти, но и медиумски извештаи, веќе втор ден со асистенција и на МВР, на кочанската депонија се одлага отпад од околните општини. Тоа е во спротивност со барањата на граѓаните и на одлуката на Советот на Општина Кочани. На терен, забележани се и неовластени лица како претураат под отпадот
Кочанската депонија стана привремена регионална депонија со одлука на тогашната Влада во 2021 година, до изградбата на регионалната депонија Мечкуевци. Пред околу два месеци граѓаните почнаа да протестираат и ја блокираа депонијата. Проблемот беше што депонијата не е оградена и обезбедена, на неа постојано имаше неовластени лица и често се палеше, што пак го загадуваше воздухот во градот
Камиони од локалните комунални претпријатија од општините Виница и Зрновци повторно можат да се видат на кочанската депонија. Развојот се случува и покрај одлуката на кочанскиот Совет, да се забрани депонирање на отпад од околните општини на депонијата.
Од ЈП „Солидарност“ – Виница, за ММС изјавиле дека постапиле така по насоки од Министерството за животна средина и планирање.
„Од Министерството нѐ известија дека можеме слободно да депонираме во Кочани, после состанокот што се одржа во Кочани во вторникот, а сето тоа во согласност со Одлуката на Владата на РМ од 2021 година. Градоначалниците од сите три општини кои треба да депонираат во Кочани поднесоа заедничко Барање за асистенција до МВР Кочани, за да не дојде до несакани инциденти поради тензичната состојба околу комуналниот отпад која владее во регионот. Согласно наредбите од нашите градоначалници, ние ги пуштивме камионите да депонираат во Кочани.“
Од Виница велат дека прво побарале од Министерството за животна средина сами да си отворат депонија. Но им било забрането такво нешто и практично добиле наредба – отпадот да го носат во Кочани.
Што е проблемот?
И Виница и Зрновци депонираа отпад на кочанската депонија од 2021 година. Тоа е дел од планот за изградба и отворање на регионалната депонија и погон за обработка на отпад кај Мечкуевци, Свети Николе. Тендерот за изградба на депонијата кај Мечкуевци се очекува по Нова година, а изградбата би требало да трае околу 18 месеци.
Пред околу два месеци, дел од кочанчани излегоа на протести и го блокираа патот кон кочанската депонија. Една од главните причини беше што депонијата често се пали, што пак го загадува воздухот во градот. Демонстрантите побараа серија мерки како – оградување и обезбедување на депонијата за да се спречи присуството на неовластени лица и палење на депонијата, но и забрана за депонирање отпад од соседните општини.
Општина Кочани првично направи чекори во насока на обезбедување и оградување на депонијата, а под притисок на јавноста, потоа донесе и одлука за забрана за депонирање на отпад од други општини, што беше во спротивност со владината одлука од 2021 година. Тоа привремено ги смири страстите во Кочани.
Но, создаде големи проблеми во соседните општини – Виница, Зрновци и Чешиново-Облешево. Како дел од поширокиот план, тие општини ги исчистија сите свои депонии. Па, беа соочени со дилемата – дали повторно да отворат легални или диви депонии и да ја почитуваат одлуката на Општина Кочани или, пак, да ја почитуваат одлуката на Владата и спротивно на волјата на кочанчани да продолжат да депонираат на кочанската депонија.
Првично, не носеа ѓубре во Кочани. Но, од пред два дена тоа е сменето.
Неовластени лица
Повторното носење отпад од други општини со интервенција на МВР не е единствената работа поради која пак растат тензиите во Кочани. Независниот советник во Општина Кочани, Венко Крстевски, последните два дена објавува видеа и фотографии дека на депонијата повторно има неовластени лица.
Тој е член на надзорниот одбор кој требаше да внимава дека се почитуваат мерките за безбедност.
Во едно од видеата објавени на Фејсбук, може да се види како влегува во вербален конфликт со неовластени лица кои претураат по ѓубрето. Сомнежите на кочанчани се дека токму тие лица го палат ѓубрето и го загадуваат воздухот во градот.