„По повеќе од седум часа завршија средбите со главните преговарачи. Разговаравме на различни теми со Бесник Бислими и Петар Петковиќ и договоривме многубројни следни чекори“, вели специјалниот пратеник на ЕУ за дијалогот меѓу Белград и Приштина
Без постигнати резултати е завршена средбата во рамките на дијалогот меѓу двајцата главни преговарачи на Косово и на Србија, Бесник Бислими и Петар Петковиќ и пратеникот на ЕУ за дијалог, Мирослав Лајчак, пренесува регионалниот сервис на Радио Слободна Европа (РСЕ).
Претставникот на српската владина Канцеларија за Косово, Петар Петковиќ, по трилатералната средба во Брисел рекол дека разговорите биле тешки и дека српската делегација инсистирала на формирање Заедница на српски општини (ЗСО) и за нормализирање на односите, но дека Бесник Бислими одбил да разговара за нацртот за ЗСО.
„На средбата со Лајчак инсистиравме на формирање Заедница на српски општини бидејќи тоа е клучно прашање за опстанокот на народот, но и за процесот на нормализација. Важно прашање е прифаќањето на нацрт-статутот на ЗСО, кој го подготви ЕУ. Белград рече дека е подготвен да разговара за тој нацрт, Бислими одби да разговара. Тоа покажува дека тие никогаш нема да формираат Заедница на српски општини, не сакаат. Политиката на Албин Курти е политика на протерување на Србите, особено од северот на Косово“,
изјавил Петковиќ по средбата, пренесува српскиот портал Н1.
Петковиќ вели дека на средбата било разговарано и за исчезнатите лица и енергетиката, како и за деблокирање на српската стока која не може да влезе на територијата на Косово повеќе од една година.
„Разговаравме и за мостот на Ибар каде што укажавме што пишува во Договорот за мостот, каде е потребно Приштина да го исполни својот дел од задачата за да може мостот да се отвори. Лајчак потврди, тоа е и наш став, дека прашањето за мостот може да се реши само со дијалог, никогаш со еднострани потези и без дијалог“,
рекол Петковиќ.
Според Бислими, ова е уште еднаш средба на која српската страна потврдила дека нема да ги спроведат сите елементи од договорот за патот кон нормализација на односите, што лидерите го постигнале минатата година во Брисел и Охрид.
„Тие јасно ставија до знаење дека за нив има делови од договорот што можат да ги спроведат и дека има некои точки што не можат да ги спроведат. Тие му признаа на Лајчак дека нема целосно да го спроведат договорот“,
рекол Бислими на крајот од средбата, пренесува РСЕ.
Според главниот преговарач на Косово, нема да има повеќе средби за дијалог во текот на летниот период.
Тој најавил дека до 18 јули партиите ќе ги испратат своите коментари во однос на планот за имплементација на договорот.
По овие коментари, според Бислими, европската страна би подготвила нов предлог за имплементација на договорот.
Според Лајчак, пак, на средбата на делегациите на Белград и на Приштина се разговарало за голем број теми и страните се согласиле на многубројни следни чекори.
„По повеќе од седум часа завршија средбите со главните преговарачи. Разговаравме на различни теми со Бесник Бислими и Петар Петковиќ и договоривме многубројни следни чекори“,
напиша Лајчак на Икс.
Just finished more than seven hours of meetings on the level of Chief negotiators. With DPM @BislimiBesnik and Director @PetkovicPetar we discussed a wide range of issues and agreed on a number of follow-up steps. pic.twitter.com/h2hMwgmrmo
— Miroslav Lajčák (@MiroslavLajcak) July 2, 2024