Судот го одби барањето на обвинителот Бурим Рустеми да се раздвои постапката за ТНТ и го одложи денешното рочиште поради отсуство на ексградоначалникот на Гази Баба, Тони Трајковски. Следното го закажа за 17 јануари 2020 година, кога е извесно дека судењето за овој предмет ќе се врати на почеток бидејќи дотогаш Судскиот совет ќе констатира престанок на мандатот за двете поротнички кои наполниле по 60 години.
„Сметам дека имаше основи да се раздвои постапката, но ќе ја почитуваме одлуката на судот“, изјави Рустеми за медиумите.
Тој рече дека треба да се почека одлуката на Судскиот совет, но оти најверојатно судењето ќе почне од почеток. Сепак, смета обвинителот, нема опасност да застари делото со оглед на кривичните дела за кои се товарат обвинетите. Освен, како што рече, ако има неразумно долго одолговлекување на постапката.
Неговиот предлог кој беше одбиен беше да се раздвои постапката за Миле Јанакиески, Никола Груевски и Елизабета Најдовска од една страна, а од друга страна за Тони Трајковски и четворицата членови на комисијата за јавни набавки во Општина Гази Баба во 2011 година.
Адвокатот на Тони Трајковски, Јовица Страшевски, во изјава за медиумите рече дека судечкиот совет постапил мудро со тоа што одбил раздвојување и не сакаше да коментира каква ќе биде одлуката на Судскиот совет. Но посочи дека е законски да се констатира прекин на мандатот.
Страшевски во судница побара и поместување на новиот термин за судење – 17 јануари, за неколку дена бидејќи тогаш морал да биде во Маврово.
„Кум сум за крстот затоа морам да одам“, рече Страшевски, но неговото барање беше одбиено.
Случајот ТНТ се однесува на начинот на уривање на комплексот „Космос“ на Фијат Цаноски кој, според обвинението, е урнат незаконски и од политичка одмазда.