Оливер Дерковски информираше дека, поради прогласената вонредна состојба, Владата ќе треба да донесе одредени одлуки кои би значеле прекинување на изборниот процес
Државната изборна комисија (ДИК) и денеска продолжи со работа, затоа што нема сè уште формална одлука за одложување на изборите, освен постигнатата согласност на политичките лидери тие да не се одржат на 12 април. На денешната седница членовите на ДИК ги утврдија кандидатските листи за десеттите парламентарни избори и редоследот на партиите и коалициите на гласачкото ливче.
Партиите на гласачкото ливче ќе ги носат следните редни броеви:
1 – Демократска партија на Албанците – ДПА
2 – Демократи
3 – СДСМ и коалицијата „Можеме“
4 – Левица
5 – Алијанса за Албанците и Алтернатива
6 – Глас за Македонија
7 – Граѓанско демократска унија – ГДУ
8 – Интегра
9 – Демократската унија за интеграција – ДУИ
10 – Социјалдемократската унија – СДУ
11 – „Никогаш Северна, само Македонија“ – Единствена Македонија
12 – МОРО – работничка партија
13 – Народна партија на Ромите
14 – ВМРО-ДПМНЕ и Коалиција „Обнова на Македонија’
Од ДИК нагласија дека ова е нивна законска обврска и дека ќе работат сè додека не биде одлучено поинаку. Претседателот на ДИК, Оливер Дерковски, информираше дека, поради прогласената вонредна состојба, Владата ќе треба да донесе одредени одлуки.
„Ние ќе ги следиме тие одлуки. Се надевам дека во текот на денешниот ден ќе се случи тоа и ние ден ќе преземеме дополнителни чекори, со што на некој начин би завршил овој процес до тука. За понатаму ќе видиме како ќе се развива ситуацијата и како ќе се надминува состојбата со пандемијата, така ќе се однесуваме сите“,
изјави Дерковски.
ДИК на почетокот на денешната седница едногласно ги утврди поднесените листа од 14 политички субјекти од вкупно 15 што имаа намера да учествуваат на избори на 12 април. Остануваат уште листите на Твоја партија, за чие потврдување рокот истекува утре. Оваа партија ќе го добие бројот 15 на гласачкото ливче. Претседателот на ДИК информираше дека сите листи биле комплетни и поднесени навреме.
Во вторникот лидерите на парламентарните партии, на средба кај претседателот Стево Пендаровски, се согласија дека нема услови за одржување на предвремените парламентарни избори. Тие го овластија Пендаровски да свика консултации со правни експерти за модалитетите за откажување или одложување на изборите. Сепак, засега нема решение како да се направи тоа. Претседателот на парламентот Талат Џафери изјави вчера дека експертите по уставно право единствено биле усогласени за тоа дека распуштениот парламент не може да се состане поради тоа и предлогот на Владата за прогласување вонредна состојба беше препратен кај Пендаровски.