„Апелирам на соодветна државна реакција, каде што ќе биде имплементирана координирана акција на сет од мерки за намалување на загаденоста на воздухот која подеднакво сите не засега“, порача претседателот на Советот на Град Скопје
Во меѓувреме, премиерот Димитар Ковачевски денеска на прес-конференција кажа дека прашањето на загадувањето на воздухот не е прашање што може да се реши за период од 12 месеци
Вонредната седница на Советот на Град Скопје, на која требаше да се дискутираат препораки против аерозагадувањето, а ја иницираше советничката група на СДСМ, нема да се одржи. Ова денеска го соопшти претседателот на Советот, Трајко Славески, кој преку писмено соопштение испратено од неговата матична партија ВМРО-ДПМНЕ информира дека за одржување на седницата не е собран доволниот број на потписи.
Дополнително, Славески вели дека денеска од кабинетот на градоначалничката Данела Арсовска добил писмен одговор и мислење во врска со предложените препораки против загадувањето на воздухот, но, како што посочи, во нејзиниот одговор се наведува дека Градот Скопје веќе презема некои среднорочни и долгорочни мерки во борбата против аерозагадувањето.
„Како прв меѓу еднаквите во Советот апелирам да се воздржат партиите од правење на политика и терање на популизам на една ваква чувствителна тема која ги засега сите граѓани на главниот град. Апелирам на соодветна државна реакција, каде ќе биде имплементирана координирана акција на сет од мерки за намалување на загаденоста на воздухот која подеднакво сите не засега“,
порача претседателот на Советот, Славески.
Во меѓувреме, премиерот Димитар Ковачевски денеска на прес-конференција од посетата во „Пекабеско“ кажа дека прашањето на загадувањето на воздухот не е прашање што може да се реши за период од 12 месеци. Според него, најголемата причина за високото загадување во сите поголеми градови во текот на зимските месеци е загревањето на домовите со цврсти горива што уште повеќе загадуваат.
„Она што државата го прави, а треба да го прават и општините тоа е енергетска трансформација на државата“,
изјави денеска премиерот.
За разлика од претходните денови, денеска Скопје се најде на 53 место според листата на најзагадени градови во светот. Тоа значи подобрување на состојбата од пред извесен период кога метрополата со денови беше во топ-десет, или, пак, во топ-пет најзагадени градови. Сепак, најверојатно тоа се должи единствено на дождот кој малку го подрасчисти скопскиот воздух.
Главен загадувач во Скопје и натаму се ПМ 2,5 честичките, чија концентрација, според мерењето на „Ај-кју-ер“ од 15 часот е 2,9 пати поголема од годишната вредност на упатството за квалитетот на воздухот на Светската здравствена организација (СЗО).