„Барањето за автентично толкување на членот 11 од Законот за помилување не е оправдано затоа што Законодавно-правната комисија, а и Собранието не може да толкува норма што не постои“.
Ваква одлука попладнево донесе собраниската Законодавно-правна комисија, за која гласаа сите членови. Овој извештај треба да се усвои на пленарна седница, а пратениците очекуваат дека со ова практично ќе го запрат Уставниот суд воопшто да одлучува за помилувањата.
Автентичното толкување го побараа пратениците од власта, Сашко Костов и Диме Велковски.
Костов, кој е и член на оваа собраниска комисија, во своето излагање на седницата посочи дека причините зошто барале автентично толкување е да спречат некој што сторил криминал да избегне одговорност, како и иницијативата на Уставниот суд да одлучува дали е уставен членот 11-а од Законот за помилување.
Со членот 11-а се предвидува дека претседателот на државата може да ги повлече еднаш дадените помилувања, а со тоа што уставните судии прифатија да оценуваат дали тоа е уставно, го отворија патот за „воскреснување“ на амнестиите на Ѓорге Иванов од 2016 за повеќе од 50 лица опфатени во случаите на СЈО. За да се спречи такво сценарио, пратениците поднесоа барање за автентично толкување, со намера да се констатира дека членот 11, на кој се повика Иванов кога ги даде помилувањата, воопшто и не постои.
„Зошто бевме принудени на една ваква постапка? Во суштина членот 11 не постои, затоа што таа одредба е содржана во законот од 1993 година и таа одредба му дава право на претседателот без постапка да донесе поединечен акт за помилување. Во 2009 година се измени Законот за помилување со кој ваквата одредба се укина. Но, во 2016 година Уставниот суд го укинува Законот за измени на Законот за помилување од 2009. Претседателот на државата, тогаш Ѓорге Иванов, претпоставил дека укинувањето му дава право да се повика на членот 11 од 1993 година и помилува 56 лица. Тогаш дојдовме во ситуација на притисок од целата јавност и некој сметаше дека таа грешка може да се исправи со вметнување на членот 11-а. И така и се случи. Сега во Уставен имаме иницијатива за оценување на одредбата 11-а. Уставниот суд не се занимава со суштински прашања, дека претседателот немал надлежност да помилува, туку сега наеднаш решава дека треба да ја цени уставноста на членот 11-а“, објасни на седницата пратеничката од СДСМ, Снежана Калеска-Ванчева.
Според Деловникот, сега овој извештај од Комисијата треба да се испрати до Собранието.
„Ако Законодавно-правната комисија оцени дека барањето за давање автентично толкување не е оправдано, ќе поднесе извештај до Собранието, кое одлучува по барањето. За одлуката на Собранието се известува подносителот на барањето“, пишува во Деловникот.
Пленарна седница на Собранието, на чиј дневен ред би бил извештајот од Комисијата, најрано ќе се одржи на 11 декември.
Поради автентичното толкување, кое се покрена во законодавниот дом, денеска Уставниот суд, на предлог на судијата Осман Кадриу, го тргна од дневен ред гласањето за нацрт-решението за одлучување за помилувањата. Од вкупно девет уставни судии, „за“ предлогот на Кадриу гласаа осуммина.