Штедачите велат дека на чело на Судскиот совет кој ја контролира работата на судовите кои треба да судат за случувањата со Еуростандард банка, е поставена сопругa на должник на банката, кој имал кредит што не го исплатил
Црвенковска негира дека нејзиното семејство учествувало во малверзации со кредити и дополнително потенцира оти Судскиот совет носи одлука со мнозинство гласови. Вели дека кога и да се одлучувало за некаков предмет со банката таа се изземала и така, тврди, ќе постапува и понатаму
Павлина Црвенковска, од декември лани, со зелено светло од Собранието, е членка на Судскиот совет, а вчера нејзините колеги во ова тело едногласно ја избраа за нова претседателка . Меѓутоа, набрзо по поддршката и честитките што ги доби од колегите, на нејзина адреса беа упатени критики и обвинувања од оштетени штедачи во „Еуростандард банка“. Тие обвинуваат дека нејзиниот сопруг, Зоран Црвенковски, преку фирмата „Екопласт Рисајклинг“ од Скопје бил должник во пропаднатата банка и со тоа е дел од „мрежата сопственици на фирми кај кои завршувале нивните пари, а кои свесно не ги отплаќале кредитите“.
Според соопштението што го објавија денеска, тие се загрижени бидејќи Судскиот совет е највисок орган кој ги контролира одлуките и работата на сите судови, вклучувајќи ги и оние што треба да судат, како што велат, за криминалите во банката. Од друга страна, Црвенковска во изјава за „360 степени“ отфрла дека нејзиното семејство учествувало во некаков криминал со Еуростандард банка и дека правело малверзации со кредити. Дополнително, потенцира оти Судскиот совет носи одлука со мнозинство гласови, а кога и да се одлучувало за некаков предмет со банката таа се изземала од одлучување и така, тврди, ќе постапува и понатаму.
Што тврдат штедачите, а што Црвенковска?
По вчерашниот избор на Црвенковска, Здружението на штедачи своите обвинувања и грижи ги објави во две соопштенија на социјалните мрежи. Во последното наведуваат дека новата претседателка на судскиот совет е на нивната листа инволвирани лица за кои сметаат дека имаат удел во организираниот криминал со банката.
„Тоа е поради тоа што нејзиниот сопруг, Зоран Црвенковски, има земено кредит од банката во висина од 1,6 милиони евра со умисла за да не го врати, во име на фирмата должник ’Екопласт Рисајклинг‘ ДОО увоз-извоз од Скопје, сега во стечај. За овој конкретен случај да биде уште пошокантен и поневеројатен, верувале или не, во целата оваа работа е вмешана и нивната ќерка Ирина Црвенковска, која била вработена во Еуростандард банка и веројатно веќе погодувате, каде ако не во службата за кредитирање правни лица“,
велат штедачите во нивното соопштение.
Одлуката на членовите на Судскиот совет да ја изберат за претседателка тие ја нарекуваат преседан, после кој тврдат нема сомнеж дека криминалот во Еуростандард банка е организиран и верификуван од највисоко можно ниво.
„Да потсетиме дека токму Судскиот совет е највисокиот орган што ги контролира одлуките и работата на сите судови, основните, апелациските и Врховниот суд, вклучувајќи го и Основниот кривичен суд, кој треба да им пресуди на криминалците од грабежот на Еуростандард банка, кои без грижа на совест и со умисла ги украдоа парите на сите депоненти, физички и правни лица. Оставаме на јавноста да процени дали Павлина Црвенковска, со сите околности околу неа и конфликт на интереси, е достојна да го води Судскиот совет. Нашиот став околу ова е јасен. Ограбените физички и правни лица од Еуростандард банка не можат а да не бидат загрижени дека системот кој еднаш не успеа да ги заштити, со постојаното молчење и непреземањето акции на институциите од тој систем, сега и ги понижи со поставување на ваков претседател на Судскиот совет како една од најважните институции во системот која треба всушност да ги заштити“,
велат штедачите.
Црвенковска, пак, во изјава за „360 степени“ одговара дека нема конфликт на интереси и потсетува дека Судскиот совет носи одлука со мнозинство гласови, а нејзиниот како претседателка не се разликува од гласовите на другите членови.
„Досега, кога се одлучувало во врска со предмет поврзан со банката јас секогаш сум се изземала од гласање. Впрочем постојат записници од кои може ова да се потврди. Гарантирам дека и во иднина ќе постапувам идентично“,
вели Црвенковска.
Таа смета дека нејзиниот избор за претседателка им пречи на поединци и одредени кругови, па наоѓаат секаков начин да ја дискредитираат. Кредитот на сопругот, вели таа, се појавува во јавноста деновиве иако случајот со Еуростандард банка ќе наполни една година.
Тврдењата дека не станува збор за никакви малверзации со кредитите во кој е вмешано нејзиното семејство, таа ги објаснува со тоа дека фирмата „Екопласт Рисајклинг“ во 2014 година влегла да инвестира во фабрика за рециклажа на пластика и за таа цел подигнала неколку кредити од банката и сите средства кои се земени се наменски, подигнати според сите законски прописи и ниту еден денар не завршил во приватни џебови на луѓе во или надвор од државата.
„Во периодот од 2014 до 2018 година фирмата работеше активно, во неа беа вработени 50-тина работници кои остваруваа извоз на пазарот во Италија и воТурција и остваруваше приходи во милионски износи. Затоа ’Екопласт‘ редовно ги плаќаше достасаните обврски кон сите, вклучувајќи ги и тие кон банката. Поради објективни причини, односно поради сериозно нарушени услови на пазарот во светски рамки, а особено во Европа, во 2018 година беше неопходно да се запре производството и да се отпуштат сите вработени. Во такви услови ликвидноста на фирмата не овозможуваше понатамошно сервисирање на обврските кон банката. Уште веднаш фирмата започна со барање на стратешки партнер за рестартирање на производството, но до затворање на банката не се постигна договор со заинтересираните партнери. Банката била веднаш известена дека фирмата се затвора и дека по склучување на договор со стратешки партнер обврските во целост ќе бидат реализирани“,
објаснува Црвенковска.
Во одговорот кој го испрати до нашата редакција, претседателката на Судскиот совет се осврнува и на работата на нејзината ќерка. Нагласува дека уште во 2011 таа била вработена како правник во секретаријатот на банката, а во Секторот за работа со правни лица била префрлена дури во декември 2019 кога Народната банка веќе ѝ издала на Еуростандард забрана за кредитирање.
„Во однос на Анкетниот лист, стечајната постапка на фирмата е отворена една година пред мојот избор за член на Судскиот совет, кога и го поднесов анкетниот лист. Со денот на отворање на стечајна постапка, е именуван стечаен управник кој целосно управува со друштвото во стечај и ја има целосната капитална контрола заедно со другите органи, стечајниот судија и одборот на доверители. Од тој ден мојот сопруг повеќе нема капитална поврзаност со фирмата ’Екопласт рисајклинг‘, што значи дека нема што да се пријави во анкетниот лист поврзано со неговиот удел и кредит“,
вели Црвенковска.
Која е новата Павлина Црвенковска?
За Црвенковка вчера „за“ гласаа сите членови на Судскиот совет, откако за претседателка ја предложи нејзиниот колега од советот, Сашо Георгиев, што беше поддржано од уште неколку членови. Од членовите кои се со право на глас, единствено не гласаше довчерашниот претседател Киро Здравев, но тој се наоѓа во изолација и воопшто не присуствуваше на седницата.
Црвенковска е најнов член на Судскиот совет, Собранието ја избра во декември лани. Од 2006 до 2020 таа работеше како судски советник во Скопска апелација. Претходно, беше советничка во кабинетот на Владо Бучковски, додека тој беше премиер во владата на СДСМ и на ДУИ (2004-2006 година), а исто така била и раководителка на одделение во Министерството за одбрана, додека Бучковски беше министер (2002 – 2004 година). Има искуство и како адвокатка и приправничка во Кривичниот суд.
Откако беше избрана за претседателка, одговарајќи на новинарските прашања таа порача дека не треба да се инсинуира дека тоа што била советник во извршната власт пред 15-тина година е причина да биде дел од Судскиот совет, туку тоа што има професионален и личен интегритет.
„Мојата работна кариера во разни периоди ме носел на различни места. Во одреден период точно е дека сум работела во органи на управа, покрај тоа што 25 години сум работела во правосудните органи. Не сум била член на извршна власт, туку бев државен советник. Грубо е да се инсинуира дека заради тоа што во одреден период од мојата кариера сум работела во органи од управата јас сум тука каде што сум. Јас сум тука затоа што поседувам личен морален интегритет, големо професионално искуство посебно во правосудните органи, од основен до апелациски суд, сум била и адвокат“,
рече Црвенковска која ветува дека ќе направи сè за да исклучи какво било политичко, но и бизнис влијание врз членовите на Судскиот совет.
Нејзината порака, која впрочем ја испраќа и денеска, е дека ќе направи сè за да се создаде ефикасен судски систем со професионални судии, судии кои нема да се плашат и кои сами ќе одлучуваат согласно со закон и согласно со нивниот интегритет.