Околу половина милијарда животни изгореа, а 24 лица починаа во пожарите кои се уште беснеат во Австралија. Поради огнените стихии небото над Австралија доби крвава боја, а пожарникарите велат дека последните 24 часа биле најлоши во историјата на земјата.
Експертите се загрижени дека во пожарите можат да исчезнат некои растителни и животински видови. Се проценува дека настрадале околу 8.000 коали, што е третина од бројот на овие животни на кои Австралија им е дом. Најголеми шанси за преживување имаат кенгурите, кои се големи и брзи, додека коалите се најзагрозени затоа што се мали и спори. Освен тоа тие се хранат со листови од растението еукалиптус што содржи запалливо масло, поради што се и дополнитено загрозени.
Околу 150 пожари продолжуваат да беснеат низ Нов Јужен Велс, додека 39 се уште се активни во соседната Викторија. Се проценува дека повеќе од 1.200 домови се уништени, а пепелосани се милиони хектари земја.
Дел од градовите кои се најтешко зафатени од пожарите, се напуштени. Таков е градот Памбула, каде улиците се пусти и покриени со густ чад, додека небото над градот е црвено.
Околу 30 километри јужно од Памбула црвено небо надвисна и над градот Еден. Стотици жители се засолнија на плажите, по наредба на полицијата.
Донациите за справување со пожарите достигнаа рекордни бројки и за само два дена беа собрани околу 13 милиони долари. Меѓу познатите кои донираа за Австралија се најдоа и американската пејачка Пинк, како и холивудската актерка со австралиско потекло, Никол Кидман. И двете донираа по 500.000 долари за кризата во Австрaлија.