И на едниот и на другиот премиер сум им укажувала работи кои можеби и не биле најпријатни, сум била таа која некогаш сум ја зборувала и потешката вистина, вели Шекеринска
Дали корупцијата ќе ја поправиме со тоа што ќе одржиме говор за корупција или ќе ја поправиме со тоа што ќе кажеме што сме направиле и што ќе направиме, вели министерката за одбрана, Радмила Шекеринска, коментирајќи го вчерашниот говор во МАНУ на поранешниот претседател на државата, Бранко Црвенковски.
„Сум соработувала со повеќе претседатели на партии, со претседатели на влади и со владините и партиските тимови, но сум имала едно правило. Не раскажувам мислења тогаш кога е популарно тие да се кажат, туку тогаш кога е вистинското време некои работи да се подобрат. И на едниот и на другиот премиер сум им укажувала и работи кои, можеби, и не биле најпријатни. Аплауз има кој да удира. Сум била таа која некогаш сум ја зборувала и потешката вистина“,
рече Шекеринска во вечерашното гостување на ТВ Сител.
Прашана во врска со изјавите на поранешниот претседател на државата Бранко Црвенковски, кој во вчерашниот говор на собирот во МАНУ изнесе низа критики за состојбата во државата, Шекеринска вели дека не е во тоа што ќе се каже во говорите, туку што ќе се направи за тие проблеми да се решаваат.
„Нашата влада се посвети на решавање на проблеми што не сме ги создале, туку сме ги добиле во наследство. И мислам дека е коректно сите, колку што можеме, да помогнеме да тргнеме напред. А, тоа дека сме поделена држава, дека има многу поларизирана политика, сега, ќе извините, имам малку повеќе искуство, не гледам дека претходните парламенти или влади живееле во идиличен свет во кој сме се согласувале сите“,
додаде Шекеринска.
За критиката од експретседателот Црвенковски дека се зголемил јавниот долг на државата, Шекеринска вели дека тоа е тема која е присутна 20 години.
„Во сегашниот свет, не само постковид, туку ако ги анализирате и документите и на Светска банка и на ММФ, ќе видите дека едни од најразвиените држави се оние на кои во овој период им растеше долгот. Инаку, ако тргнете дека не треба да се задолжувате, нема начин како да ја водите државата. Прашањето е за што ги користите парите. Оваа Влада покажа дека парите се вложуваат таму каде што треба“,
рече Шекеринска.