Собранието на почетокот на февруари се очекува да ја донесе националната стратегија за спречување корупција и судир на интереси.
„Претседателот на Собранието нè извести дека ова Собрание ќе ја донесе стратегијата и дека најверојатно ќе биде на почетокот на следниот месец. Битно е дека ќе биде донесена во овој состав, изјави претседателката на Антикорупциска, Билјна Ивановска, која денеска заедно со членовите на оваа комисија се сретна со Џафери и му го предаде документот.
Ивановска рече дека верува дека сите парламентарни партии ќе ја поддржат и таа ќе биде усвоена со консензус, а ваквото уверување го темели на впечатоците што ги добила во текот на подготовката на стратегијата, во која беа вклучени претставници од многу институции, од невладиниот сектор, од медиумите, експерти.
Презентирајќи дел од содржината, Ивановска рече дека ризични области во кои најмногу се препознаваат коруптивни однесувања се вработувањата, процесот на јавни набавки, контролната и надзорна улога и донесувањето одлуки. Стратегијата треба да се спроведе од страна на институциите во следните пет години, а целта е подигнување на довербата на граѓаните во системот.
Националната стратегија, ДКСК ја подготвувала пет месеци и со нејзиното усвојувањето ќе се покаже подготвеност и политичка волја за борба во една широка коалиција заедно со граѓанскиот сектор против најголемото општествено зло во оваа држава, а тоа е борбата против корупцијата, рече Ивановска.