Првата дама е меѓу нас, прва дама до и по 8 мај повторно ќе биде Бети Пендаровска, порача Ковачевски од Осмомартовскиов марш на СДСМ во Кавадарци
Заменик-претседателката на СДСМ Сања Лукаревска, истакна дека како ќе наближува денот на изборите, еднакво пропорционално ќе засили говорот на омраза и на сексистичките коментари. Таа порача дека социјал-демократките жестоко ќе реагираат на секоја навреда, на секој непримерен збор и потценувачки гест кон секоја жена од која било партија
Пред вечерашниот партискиот конгрес за потврда на претседателската кандидатура на Стево Пендаровски, СДСМ денеска одржа и Осмомартовски марш во Кавадарци.
Претседателот на партијата, Димитар Ковачевски на маршот порача декa СДСМ е партија која ги почитува жените и ја признава нивната способност и моќ.
Тој смета дека СДСМ е пример за тоа како треба да изгледа вистинска рамноправна застапеност и вистинска родова еднаквост, и дека партијата секојдневно работи за поголемо учество на жените во сите сфери на општествениот и политичкиот живот.
Во однос на законските решенија, Ковачевски кажа и дека СДСМ изминативе 7 години направил огромни исчекори при што е усвоен Законот за спречување и заштита од насилство врз жените и семејното насилство, а воедно е изработена и Стратегијата за родова еднаквост 2022-2027 која е основниот стратешки документ со кој се поставува основата за унапредување на родовата еднаквост и зајакнување на жените.
„Сакам да ви ветам дека јас ќе бидам тој којшто ќе го предложи законот за родова еднаквост. Не може мажите да се кријат зад жените и да ги пуштаат жените да го предлагаат законот за родова еднаквост. Мажите треба да застанат во прв ред и тие да го предложат законот за родова еднаквост. Затоа, јас ви ветувам дека по 8 Мај, како претседател на Владата, првиот закон кој ќе го предложам ќе биде закон за родова еднаквост, јас прв, мажите до мене и жените рамо до рамо со нас“,
рече Ковачевски.
Кажа и дека на половина од министерските позиции на СДСМ во Владата се жени, а дека неговата партија е предводник на концептот за 50-50 на листите за пратеници и советници.
„Во мојот мандат како премиер министрите кои ги предложив, беа 50% жени, сите заменици-министри кои ги предложив беа жени, сите државни секретари кои ги предложив беа жени и сите членови на мојот кабинет освен еден беа жени. Тоа е рекорд кој никој не може да го сруши, само може да го израмни“,
рече Ковачевски.
Заменик-претседателката на СДСМ Сања Лукаревска, истакна дека како ќе наближува денот на изборите, еднакво пропорционално ќе се засилува говорот на омраза и на сексистичките коментари.
Таа порача дека социјал-демократките, жестоко ќе реагираат на секоја навреда, на секој непримерен збор и потценувачки гест кон секоја жена од која било партија.
