Во врска со состанокот, тој кажа дека досега немало напредок, а дали денеска ќе има не сакаше да коментира, но порача дека „оптимистот секогаш очекува нешто добро“
Вчерашниот напад на бугарскиот клуб „Цар Борис Трети“ не треба да се коментира, тоа е брутален акт на омраза, вели копретседавачот од бугарска страна на Заедничката мултидисциплинарна експертска комисија за историски и образовни прашања меѓу Северна Македонија и Бугарија, Ангел Димитров.
Коментарот тој го даде пред Министерството за надворешни работи (МНР) Скопје, каде што со другите членови на Комисијата од бугарска страна тој пристигна на новата средба за историските прашања.
„Инцидентите влијаат на двете страни, но не и на работата на Комисијата. Ние имаме свој научен пристап. Тоа е нашето решение на проблемите“,
изјави Димитров.
Во однос за средбата, пак, тој рече дека нема коментар, а на прашањето што ќе биде на дневен ред, тој кажа дека истото што било на минатата, предминатата средба…
На прашањето дали тоа значи дека засега нема напредок, одговори потврдно.
„Тоа значи дека нема напредок, а дали ќе има ќе видиме денеска. Оптимистот секогаш очекува нешто добро“,
рече Димитров.
Во однос на инцидентот во Охрид со бугарскиот клуб, вчера во охридската полиција беше пријавено оштетување на стаклото на клубот направено од огнено оружје.
Ова беше трето оштетување на „Цар Борис Трети“, за што нашето МНР излезе со реакција дека овие вандалски активности се целосно неприфатливи. Протестна нота испрати и бугарското МНР од каде за денеска се очекува да биде повикана и македонската амбасадорка Агнеса Руси-Поповска.