Владата на почетокот на декември 2021 ги замрзна цените на основните прехранбени продукти до крајот на јануари 2022, а потоа мерката ја продолжи и до крајот на февруари
Замрзнатите цени на дел од прехранбените продукти важат до крајот на февруари, а потоа наместо тоа најверојатно Владата ќе се одлучи за мерка за утврдување на маржите во трговијата на големо и мало, со цел да се спречи нивно зголемување.
„Оваа и наредната недела ќе имаме директни средби со сите засегнати страни, посебно производителите и трговците со прехранбените производи кои се наведени во одлуката за замрзнување, за да најдеме начин да нема зголемување на цените. Најверојатно, ќе се оди со дефинирање маржи и во трговијата на големо и на мало, имајќи предвид дека во делот на производите што ги произведуваме домашно секако може да се интервенира, но ние сме забележале дека и тие производи кои се увезуваат, кај нив генерално има поголемо зголемување на цените. Затоа најверојатно ќе се оди со опцијата на маржите“,
најави министерот за економија, Крешник Бектеши.
Владата на почетокот на декември 2021 ги замрзна цените на основните прехранбени продукти до крајот на јануари 2022, а потоа мерката ја продолжи и до крајот на февруари.
Мерката опфаќаше замрзнување на цените за: леб, шеќер, брашно – тип 400, сончогледово масло за јадење, трајно млеко со масленост од 2,8, 3,2 и 3,5 проценти, свежо месо и сувомеснати производи, сирење, урда, ориз, јајца и тестенини.
Одлуката значеше дека највисоките цени за овие продукти остануваат на нивото на редовните цени кои се применувале на 1 декември 2021 година, во трговијата на големо и трговијата на мало.