Според информациите на украинските власти, три лица загинале, меѓу кои и бремена жена, во нападите со камикаѕи-дронови на Киев, а четири лица ги загубиле животите во ракетниот напад на североисточната област Сума
Најмалку седум загинати е последниот биланс на жртви од денешните руски напади со беспилотни летала на повеќе региони на Украина, меѓу кои и на главниот град на земјата, Киев, јавуваат агенциите.
Според информациите на украинските власти, три лица загинале, меѓу кои и бремена жена, во нападите со камикаѕи-дронови на Киев, а четири лица ги загубиле животите во ракетниот напад на североисточната област Сума.
Новите руските воздушни напади рано утринава ги погодија Киев и јужните области Днепропетровск и Одеса, велат официјални претставници на Киев, додека руските и украинските сили водат жестоки борби околу два града во источниот украински регион Донбас.
Според украинските вооружени сили, речиси 40 дрона бил соборени синоќа и утринава ширум земјата.
На југот на земјата, околу пристаништата Одеса и Миколајев бил пресретнати 26 беспилотни летала камикаѕи, додека во северниот и централниот дел на Украина, вклучително и главниот град Киев, соборени се 11 дрона.
Исто така, биле пресретнати и три крстосувачки ракети на истокот на Украина.
Денешните напади следуваат една недела откако бран руски проектили усмртија 19 луѓе ширум Украина во најтешкото бомбардирање на земјата во последните неколку месеци.
„Цела ноќ и цело утро непријателот ги тероризира цивилите. Беспилотни летала и ракети камикаѕи ја напаѓаат цела Украина. Во Киев е погодена станбена зграда. Непријателите може да ги нападнат нашите градови, но нема да можат да не скршат. Окупаторите ги чека праведна казна и осуда на идните генерации. Ќе избереме победа“,
рече утрово украинскиот претседател Володимир Зеленски.
Во областа Днепропетровск, на југот на земјата, голем пожар избувнал во енергетски објект откако ноќеска бил погоден со проектил, изјавија денеска локалните власти.
Градското собрание на пристанишниот град Одеса на југот на земјата соопшти дека руски воени авиони денеска истрелале ракети на инфраструктурните објекти во регионот.
Русија на 10 октомври започна со жестоки ракетни нападни на Киев и други градови ширум Украина, од кои дел и во регионите што Москва неодамна ги анектира и ги прогласи за дел од територијата на Руската Федерација.
Во овие напади 19 лица беа убиени, а ранети 105.