Несреќата се случила во 7:50 часот по локално време на железничка станица во североисточниот регион Каталонија во Шпанија, кога еден воз удрил во задниот дел на друг воз кој бил стациониран на станицата. Во несреќата лесно се повредени најмалку 150 лица, а петмина се со потешки повреди
Во предградието на Барселона утринава се судриле два воза при што најмалку 150 патници се здобиле со повреди. Несреќата се случила во 7:50 часот по локално време на железничка станица во североисточниот регион Каталонија во Шпанија, кога еден воз удрил во задниот дел на друг воз кој бил стациониран на станицата, јави „Дејли мејл“.
Итната помош на Каталонија соопшти дека 150 лица се здобиле со лесни повреди, додека пет лица се потешко повредени, но дека не станува збор за повреди кои се сериозни или опасни по живот. Три лица, пак, се пренесени во болница со повреди како скршеница на глуждот.
Службите за итни случаи излегле на местото на настанот и за половина час ги евакуирале патниците од двата воза.
Засега не се познати причините за несреќата.
Естер Капела, претставник на каталонската влада во Мадрид, за Шпанското национално радио изјави дека официјални лица го истражуваат инцидентот.
Поради несреќата, железничкиот сообраќај бил накратко во прекин на неколку линии.