Според Шекеринска, тоа што сега за секое место има по девет кандидати е резултат и на нашето членство во НАТО, меѓутоа и на зголемените плати и на вратената доверба во професијата
Над 1 800 кандидати се пријавиле на конкурс за 200 професионални војници, соопшти денеска министерката за одбрана Радмила Шекеринска. Според неа, тоа е сигнал дека армијата ќе се подмладува, а може да се подмладува, како што рече, само ако се вложува во повисоки плати, во подобра опрема, во подобар имиџ и во подобри шанси за сите оние што работат во оваа сфера.
Според Шекеринска, интересот на младите да пристапат кон армијата, што се гледа по тоа што за секое место има по девет кандидати, е резултат и на нашето членство во НАТО, меѓутоа и на зголемените плати и на вратената доверба дека ова е професија, која државата ја цени и на соодветен начин ја плаќа.
„Армијата секогаш ја враќала довербата во себе, успевала да одговори на задачи и во најтешки околности, но сега покажавме и дека државата си ги цени своите војници, своите офицери и младите луѓе од сите етнички заедници, и мажи и жени,
изјави Шекеринска, која денеска ги посети кандидатите за професионални војници кои се на физички проверки на Воениот стадион во Скопје.
Таа очекува следната година да се зголеми и интересот за запишување во Воената академија и на тој начин да се подмлади не само војничкиот туку и офицерскиот состав на армијата.
Министерката посочи дека на конкурсот во 2017 и во 2018 година за 125 места за професионални војници имало околу 200 кандидати. Од тие кандидати, како што рече Шекеринска, беше тешко да се најдат луѓето што ги исполнуваат сите услови.