На повидок е договор за одложување на пописот, но неизвесно е за кој термин и дали со тоа ќе се согласат и другите политички партии
Повеќе од два часа, со една пауза, трае средбата очи в очи меѓу водачите на двете најголеми партии во земјава, премиерот Зоран Заев (СДСМ) и Христијан Мицкоски (ВМРО-ДПМНЕ), во Клубот на пратеници во Скопје.
Првпат по формирањето на новата влада на СДСМ и ДУИ, Заев и Мицкоски седнаа на иста маса, овој пат без придружници од нивните табори.
Заев влезе на средбата со најава за можен договор за пролонгирање на пописот, чија теренска фаза треба да почне в четврток, без да посочи можни нови термини. ВМРО-ДПМНЕ, пак, деновиве побара пописот да се одложи најрано до септември.
Сепак, и да има договор Заев-Мицкоски за одложување на пописот, тоа не значи автоматски откажување на операцијата, со оглед на тоа што ќе треба да се прават законски измени, но и да се обезбеди согласност од другите парламентарни партии.
Денеска и првиот вицепремиер Артан Груби, како секретар на ДУИ, се обиде да ги собере претпладнево во Клубот на пратеници секретарите на другите партии од албанскиот блок за да се координираат за пописот, ама опозициските Алијанса за Албанците и Алтернатива не ја прифатиле поканата.
Пред средбата Заев-Мицкоски, од ДУИ информираа дека се координирале со премиерот и дека и ДУИ е за тоа да се обезбедат соодветни услови за непречено одржување на пописот.
Иницијативата за средба овој пат дојде од Мицкоски, а Заев прифати тет-а-тет состанок, на кој, освен за пописот, требаше да се разговара и за измените на Изборниот законик и блокадата на законите во парламентот.
Искуството во изминатите три и пол години, колку што трае нивната „кохабитација“, укажува дека Заев и Мицкоски, и покрај мноштвото лидерски средби, тешко наоѓаа заеднички јазик за крупни прашања, како што беа референдумот за името или, пак, Законот за јавно обвинителство.
На почетокот на овој месец Заев излезе со предлог за широка коалиција, во која би влегла и ВМРО-ДПМНЕ, но нагласи дека со Мицкоски тешко се разговара, односно дека му било полесно да најде решение со Груевски отколку со сегашниот опозициски лидер.