Двојно поголемиот Избирачки список, лошиот квалитет на отпечатоците на прсти на гласачите добиени од МВР и ковид-мерките, се причина за метеж на дел од избирачките места, вели првиот човек на Државната изборна комисија
Метежот на дел од избирачките места ја натера Државната изборна комисија да донесе едногласна одлука дека на сите гласачи кои најдоцна до 19 часот ќе се најдат во дворот или во ходникот од гласачкото место ќе им се овозможи да гласаат и по 19 часот, кажа претседателот на Државната изборна комисија, Алекандар Даштевски на прес-конференција пред малку.
„Во 19 часот може да се затвори влезот на дворот, но луѓето кои се нашле во дворот, во ходникот, ќе им се даде можност да гласаат… ДИК е едногласна дека ќе се продолжи гласањето за сите луѓе кои ќе се најдат на тоа место, не само во просторијата туку и надвор во дворот затоа што тие луѓе не дошле да шетаат, туку да гласаат. Мора сите да гласаат“,
кажа Даштевски и ги повика граѓаните да излезат на гласање.
Тој вели дека метежот на избирачките места настанува поради три причини: избирачкиот список има двојно повеќе страници за разлики од претходните избори и проверката оди побавно, потоа, како што вели Даштевски, една четвртина од отпечатоците на прсти на гласачите кои ДИК ги добила од Министерството за внатрешни работи се со лош квалитет па и утврдувањето на отпечатоците оди бавно. Како трета причина ги наведе ковид-мерките. Тој повтори дека на општинските изборни комисии им е пратено упатство, избирачките одбори во просторијата за гласање да пуштаат онолку гласачи, колку што има паравани за гласање.