Царинската управа вечерва преку соопштение ги објави првичните наоди од внатрешната контрола
Првичните наоди од внатрешната контрола на Царинската управа покажуваат дека на 18.11.2021 година, од страна на царинските службеници електронски не е евидентиран излезот на возилото со регистарски таблички СК0284БА – автобусот на „Беса Транс“ од Скопје, кој вчера рано наутро по сообраќајна несреќа во Бугарија се запали и притоа загинаа 45 патници, а седум се повредени.
Во соопштението што вечерва го објавија од Царина се вели дека била извршена само заверка на евидентентиот лист за превоз на патници.
„За досега утврдените неправилности во постапувањето, за двајца царински службеници кои биле на смена кога возилото излегло од државата, ќе бидат преземени мерки суспендирање од работното место, а за нивниот непосреден раководител ќе следи мерка за санкционирање“,
соопштија од Царина.
Од Цринската управа објаснуваат дека согласно член 49 од Законот за превоз во патниот сообраќај, при вршењето на слободен превоз на патници во меѓународниот патен сообраќај, во зависност од видот на превозот, превозникот мора да има: извод од лиценца, патен налог во оригинал, евидентен лист за превоз на патници, договор склучен меѓу превозникот и нарачувачот на услугата и правилно и точно пополнет патен лист на пропишан образец, потпишан и заверен од превозникот и заверен од надлежните царински служби.
Врз основа на овие приложени документи, Царинската управа електронски го евидентира превозот и тоа на влез или излез при првото и при второто преминување на возилото преку граничниот премин на Република Северна Македонија, во зависност од релацијата на превозот.
За возилото со регистарски таблички СК 0284 БА на превозникот БЕСА Транс од Скопје, во периодот од 15.10.2020 година до 11.11.2021 година, Царинската управа има евидентирано повеќе преминувања, преку граничните премини: ГЦИ Деве Баир, ГЦИ Блаце, ГЦИ Ќафасан и ГЦИ Делчево, за различни видови на превоз, вклучувајќи и евиденција на бројот на Изводот од Лиценцата за вршење на јавен превоз во меѓународниот патен сообраќај – слободен превоз на патници. Веродостојноста на овие приложени документи од превозникот дополнително ќе се проверува, објаснуваат од Царината.
Министерството за транспорт и врски поплладнево соопшти дека автобусот на фирмата „Беса Транс БТБ“, кое се запали на автопатот во Бугарија при што загинаа 46 лица нема издадено извод од лиценца за вршење на меѓународен слободен превоз за патници, ниту пак за друг вид на јавен превоз на патници.
Поради ова Министерството и ја одзеде лиценцата на оваа компанија, односно доби забрана за вршење на дејноста.
За утрешниот ден бугарските истражни органи најавија обраќање со првични резултати од истрагата за автобуската несреќа, објави вечерва министерот за внатрешни работи Оливер Спасовски на неговиот фејсбук – профил.