Министерството за внатрешни работи (МВР) тврди дека се неточни обвинувањата од опозициската ВМРО-ДПМНЕ дека бил местен тендер за пневматици на тој начин што се правел притисок врз службениците за да се променат спецификациите за огласот.
Од МВР велат дека точно е дека во два наврати постапката била поништена, а спецификацијата има претрпено измени по поставени прашања од економските оператори. Откако била променета спецификацијата, фирмите немале дополните прашања со кои ги оспорувале измените.
„Комплетно се неточни обвинувањата на ВМРО-ДПМНЕ околу постапката за јавната набавка за пневматици. Напротив, за постапката која се спроведува по претходно поништени две постапки со скоро идентични спецификации, беа поднесени три понуди. Притоа, во текот на постапката, спецификацијата за споменатата набавка, која ја изготвува Одделението за возен парк, возила и механичарски работилници кое потоа и го менаџира спроведувањето на рамковната спогодба има претрпено измени по поставени прашања од економските оператори, a по направените измени не се поставени нови прашања од нивна страна со кои се оспоруваат измените или се ограничува конкуренцијата“,
велат од МВР.
Игор Јанушев, пак, на прес-конференција денеска обвини дека спецификацијата била „скроена“ со цел да се намести тендерот, а информациите во ВМРО-ДПМНЕ ги добиле од свиркач. Тој ја обвини помошник-министерката за јавни набавки, Андријана Савеска Павлоска, дека вршена притисок да се направат измените за да фаворизира еден понудувач.
„Со одлука на МВР тендерот е добиен од страна на ’Пнеуматик груп‘ ДОО Скопје, врз основа на најниска понуда, но по жалба од ’Мотоцентар‘ жалбата се усвојува и се враќа на повторно одлучување, по што МВР повторно одлучува исто и повторно го избира ’Пнеуматик груп‘ ДОО Скопје. ’Мотоцентар‘ уште еднаш се жали, но повторно неуспешно, за на крај МВР да ја поништи постапката и повторно да распише нов оглас“,
рече Јанушев додавајќи дека на новиот оглас, кој е распишан на 16.3.2021 година, повторно е избрана фирмата ’Пнеуматик груп‘ ДОО Скопје, а одлуката повторно е во постапка по жалба.