Распишана е национална потерница за пронаоѓање на ексдиректорот на УБК, Сашо Мијалков, кому судот вчера му одреди мерка куќен притвор пред пресудата за „Таргет-Тврдина“, потврдија од Министерството за внатрешни работи за „360 степени“.
Од МВР информираат дека ќе бараат распишување и на меѓународна потерница.
„Преземаме мерки и активности за негово пронаоѓање. Распишана е национална потерница. Бидејќи од досега преземените мерки и активности лицето не е пронајдено, ќе го известиме судот и ќе побараме да биде издадена наредба за распишување меѓународна потерница“,
велат од МВР.
Според сознанија на „360 степени“, од неделата во 16 часот на поранешниот директор на УБК, Сашо Мијалков, му се губи секаква трага. Во текот на претпладневните часови, тој последен пат бил забележан во кафулето „Дистрикт“, кое се наоѓа во рамки на хотелот „Мериот“, во непосредна близина на скопскиот плоштад.