За време на ограничувањето на движење нема да се санкционираат лицата кои пријавуваат кривично дело, соопшти Министерството за внатрешни работи.
Во врска со барањата што во јавноста беа изнесени од невладини организации, МВР информира дека граѓаните кои сакаат да пријават кривично дело тоа треба да го сторат на бесплатниот телефонски број 192 или во најблиската полициска станица и за тоа не им е потребна посебна дозвола. Тие непречено можат да се движат до најблиската полициска станица. Истото важи и за граѓаните на кои поради извршено насилство или друго кривично дело им е потребна помош во здравствена установа.
Од МВР посочуваат дека институциите функционираат без исклучоци за заштита на граѓаните и по сите пријави за семејно насилство се постапува координирано со тимовите на центрите за социјална работа.
Соопштението од МВР следува откако вчера Националната мрежа против насилство врз жени и семејно насилство побара итно дополнување на одлуката за забрана за движење на граѓаните во целата територија на државата со тоа што таа не би важела за жени жртви и нивните деца, кои го напуштаат домот поради закана и директен ризик од насилство.
Како поткрепа на ваквото барање, од Националната мрежа наведуваат многубројни ризиците за зголемување на насилството во овие вонредни околности.
