Од МВР информираат дека ваквите обиди за измама се со меѓународен предзнак имајќи предвид дека електронски пораки со слична содржина во изминатиот период биле испраќани и на граѓани во земјите од регионот
Министерството за внатрешни работи и Управата за јавни приходи биле цел на обид за измами. Како што наведуваат од двете институции, до граѓани биле испраќани лажни електронски и СМС-пораки преку кои се бараат лични податоци од граѓаните, со што може да дојде до злоупотреба.
„Во однос на пристигнати пријави од граѓани за добиенa електронска порака, наводно во име на министерот за внатрешни работи, во соработка со полициската канцеларија на Европол, во која во вид на повик за појавување во суд од страна на Сектор за прекршоци, примачот на пораката се известува дека е предмет на наводни правни постапки за низа измислени кривични дела, кои ги нема сторено, МВР ги известува граѓаните дека станува збор за лажна порака која не е испратена од страна на МВР ниту од која било институција за спроведување на законот“,
информираат од МВР.
Притоа, како што е наведено во соопштението од МВР, во испратените мејлови, примачот на пораката се повикува да го контактира испраќачот преку вибер-врска.
„Овие електронски пораки се класичен обид за измама во кој целта на измамниците е да дојдат до личните податоци на испраќачот со цел нивна понатамошна злоупотреба. Затоа апелираме на посебно внимание овие пораки да не се отвораат, а уште помалку да се контактира испраќачот преку доставениот линк и да се споделуваат личните податоци кои ќе ви бидат побарани“,
се посочува во соопштението.
Од МВР ги предупредуваат граѓаните да не ги отвораат врските и датотеките што се испратени во прилог на електронската порака која доаѓа од непознат испраќач, со цел заштита на вашиот компјутерски систем од малициозен софтвер.
Воедно, информираат дека ваквите обиди за измама се со меѓународен предзнак имајќи предвид дека електронски пораки со слична содржина во изминатиот период беа испраќани и на граѓани во земјите од регионот.
И од Управата за јавни приходи (УЈП) информира дека вчера и денеска непознат испраќач, користејќи го нејзиното лого, преку СМС се обидел да наведе граѓани да споделуваат лични и податоци од дебитни и кредитни картички.
Пораките се испраќани од телефонскиот број +389 79 212 628 со следната содржина: „Извршете ја задолжителната пријава на УЈП https://ujp.mk/verifikacija.
„Овој линк е лажен и не води кон електронска адреса на Управата за јавни приходи“,
соопштуваат од УЈП и апелираат да не се отвораат таквите пораки и да не се отвора врската.
Доколку некој ја отворил врската пратена во порака, УЈП повикува да не ги пополнува полињата во кои се бараат лични податоци од граѓаните, затоа што може да бидат злоупотребени.
„Управата за јавни приходи ги презема сите неопходни активности за справување со конкретната ситуација“,
се наведува во соопштението.