Министерот Спасовски вели дека Северна Македонија практикува ваква меѓународна соработка за заштита на сведоци, а досегашното полициско искуство со земјите од каде што биле релоцирани лица за нивна заштита е исклучително позитивно
Министерството за внатрешни работи (МВР) и Меѓународниот кривичен суд со седиште во Хаг, Холандија, денеска потпишаа Договор за соработка во областа на заштита на сведоците.
Со овој договор се овозможува правна рамка за соработка помеѓу двете институции за заштитата на сведоци, жртви и други лица преку нивна релокација во случај кога за нив има ризик поради сведочење пред хашкиот суд.
„Заштитата на најранливите категории лица, односно жртвите и сведоците кои сакаат да помогнат во расветлувањето на кривичните дела и во изнесувањето на нивните сторители пред лицето на правдата е определба на секое демократско општество. МВР активно се вклучува во таа глобална борба против овие форми на кривични дела, кои претставуваат сериозна закана за човештвото, безбедноста и интегритетот на луѓето и заедниците“,
рече министерот за внатрешни работи Оливер Спасовски, кој го потпиша договорот во име на МВР.
Според него, потпишувањето претставува само продолжување на поддршката за судот, потсетувајќи дека земјава го потпиша Римскиот статут во 1998 и го ратификуваше во 2002, со кој е основан и Меѓународниот суд.
Спасовски во обраќањето рече дека Северна Македонија практикува ваква меѓународна соработка за заштита на сведоци, а досегашното полициско искуство со земјите од каде што биле релоцирани лица за нивна заштита е исклучително позитивно.
„Досегашното полициско искуство со земјите кои имаат релоцирано лица на наша територија е исклучително позитивно, со доследно и максимално почитување на довербата, професионалноста и утврдените одредби од склучените договори. Убеден сум дека, со потпишувањето на овој Договор, Одделението за жртви и сведоци при Меѓународниот кривичен суд ќе ја прошири својата соработка со нашата Единица за заштита на сведоци, ќе ги препознае и применува овие принципи на соработка во оваа исклучително специфична и чувствителна област на полициско работење“,
потенцираше министерот.
Во име на Меѓународниот суд од Хаг, договорот го потпиша секретарот Питер Луис. Настанот се одржа во Клубот на пратеници во Скопје.