Во период од една недела, беа забележани два инциденти со групи кои скандираа пароли со говор на омраза кон Албанците. Вториот случај беше забележан вчера во Ѓорче Петров, за што на социјалните мрежи беше објавено и видео на кое се слушаат скандирањата.
Како што може да се види на видеото, додека поминува свадбена поворка со албански знамиња, група млади момчиња скандираа навредливи пароли по што неколку мажи од поворката се упатуваат кон нив. Од видеото не се забележува дека доаѓа до поголем инцидент.
Од МВР велат дека од овој настан досега де идентификувани 16 лица. Инволвираните се повикуваат на разговор, а најавуваат и кривични пријави. Претходниот викенд, пак, беше забележан другиот случај. И тогаш се скандираа истите пароли од навивачка група која поминуваше по плоштадот „Македонија“ во центарот на Скопје.
„Станува збор за два случаи за што ќе бидат поднесени кривични пријави. Се утврдуваат идентитетите на учесниците, се повикуваат на разговор, се извршуваат разговори со нив. Конкретно за вчерашниот случај утврден е идентитетот на 16 лица и се преземаат сите дополнителни активности со цел да се расчисти случајот“,
изјави денеска Сузана Праниќ -Талевска од Секторот за односи со јавност при МВР.
Таа порача дека Министерството ќе има нулта толеранција за ваквите случаи.
И Владата и премиерот Зоран Заев минатата недела дискутираа и го осудија говорот на омраза на навивачката група што беше снимена во Центар.
„Владата донесе заклучок со кој најостро се осудува навивачкото поведение со кое се предизвикува омраза, раздор и нетрпеливост врз етничка основа. Владата беше информирана дека МВР презема соодветни активности за расчистување на делото, за што соодветно ќе ја информира јавноста. Го повикуваме јавното обвинителство проактивно да дејствува во рамките на своите надлежности и да постапи по вчерашниот случај на говор на омраза на плоштадот“,
порача тогаш Заев.