„Секако нема да дозволиме ни минимален ризик по нивното здравје во тој процес. Значи, тоа ќе го правиме единствено во моментот кога сме сигурни дека нема никаков ризик по однос на нивната здравствена состојба“, рече шефот на дипломатијата во вечерашното гостување во Дневникот на ТВ Сител
По враќањето на првиот пациент што се лекуваше во Белград по пожарот во Кочани денеска, до крајот на оваа недела се очекува во земјава да бидат вратени уште неколку пациенти кои се наоѓаат во здравствени установи во Австрија и во Белгија.
Ваквите најави ги сподели министерот за надворешни работи и надворешна трговија Тимчо Муцунски во вечерашното гостување во Дневникот на ТВ Сител, но посочи дека станува збор за сложен процес кој ќе биде спроведен во моментот кога координацијата на надлежните ќе процени дека нема никаков ризик по здравствената состојба на овие лица.
Имено, Муцунски беше прашан кога може да се очекува во земјава да се врати поголема бројка пациенти згрижени во странство по трагедијата во Кочани.
„Не е секогаш лесно по информациите коишто ги добиваме да се предвиди точно кога и колку пациенти ќе се вратат. Тоа зависи од нивната здравствена состојба, како таа се развива, како меѓусебно проценуваме, но по најавите коишто ги имаме, јас велам тоа чекаме да стане конечно, но веќе сигурни најави имаме дека до крајот на оваа недела ќе се вратат неколку пациенти коишто беа на лекување во Австрија, неколку пациенти коишто беа на лекување во Белгија, но да оставиме да продолжи таа меѓусебна координација. Ние би сакале што побрзо да ги вратиме пациентите во државата, да бидат поблиску и до нивните семејства, нашиот здравствен систем да ги апсорбира истите, но секако нема да дозволиме ни минимален ризик по нивното здравје во тој процес. Значи, тоа ќе го правиме единствено во моментот кога сме сигурни дека нема никаков ризик по однос на нивната здравствена состојба“,
рече Муцунски.
Тој упати благодарност до сите држави кои пружија медицинска и логистичка помош за згрижување и лекување на голем број повредени во пожарот во Кочани.
„Солидарноста што ја добивме не беше само на зборови, туку солидарност на дело. Благодарни сме и на нивните влади и на нивните народи што ги отворија вратите и ги примија нашите сограѓани. Веќе размислуваме како Влада да се заблагодариме затоа што искрено сме благодарни за тоа што го направија“,
рече министерот.
Прашан зошто Германија не е една од земјите која прими наши пациенти и дали имало некакви разговори со тамошни власти, бидејќи станува збор за земја кој е наш прв трговски партнер и имаме изградено одредена дипломатска близина, Муцунски не одговори конкретно и само кажа дека понудите кои доаѓале од одредени земји биле такви што повеќе одговарале на потребите што сме ги имале на терен.
„Германија е наш клучен партнер, и политички, и трговски и безбедносно, ние сме партнери и во НАТО. Во тој момент понудата којашто се добиваше од страна на одредени земји беше понуда којашто повеќе одговараше на потребите коишто ги имавме ние на терен. Тоа е тоа што можам да ви кажам. Никако потценувајќи било која земја во Европа, сите изразија сочувство, сите бараа начин како можат да ни помогнат. Нешто што дополнително би го кажал во оваа смисла е дека ние имавме понуда и за апсорпција и на поголем број од пациентите од тие што ги упативме, но во еден момент сфативме дека имаме доволен капацитет во нашиот здравствен систем“,
рече шефот на дипломатијата.
На крајот од разговорот, Муцунски рече дека следен голем предизвик ќе биде враќањето во нормала на животот во Кочани.
„Треба да размислиме што понатаму ќе направиме за нив, за нивните семејства, но и за Кочани, за градот повторно да живее добри денови, во почит кон тие што таму загинаа“,
рече тој.