Против Русковска и обвинителките Ивана Трајчева и Елизабета Јосифоска беше отворена дисциплинска постапка од страна на Јавното обвинителство поради претресот во просторите на УФП минатото лето, додека директор на оваа институција беше Муареми. Комисијата за утврдување на дисциплинска одговорност вчера донесе одлуки за трите обвинителки. За Русковска Комисијата одлучи да му предложи на Советот на јавни обвинители таа да биде разрешена, Трајчева да биде казнета со намалување на месечната плата за 30 отсто, додека Јосифоска е ослободена од одговорност
Стручноста и интегритетот се основа на секој професионалец и верувам дека при одлучувањето тоа биле основните параметри кои во овој конкретен случај се ценеле од страна на Комисијата. Ова во коментар за ТВ Алсат го вели поранешниот директор на Управата за финансиска полиција (УФП), Арафат Муареми, по одлуката на Комисијата за утврдување на дисциплинска одговорност да му предложи на Советот на јавни обвинители да ја разреши обвинителката Вилма Русковска.
Против Русковска и обвинителките Ивана Трајчева и Елизабета Јосифоска беше отворена дисциплинска постапка од страна на Јавното обвинителство поради претресот во просторите на УФП минатото лето, додека директор на оваа институција беше Муареми.
Тој обвини дека Обвинителството за гонење на организиран криминал и корупција, со кое тогаш раководеше Русковска, незаконски го спровело претресот, а недоследности беа утврдени и во специјалниот извештај на републичкиот јавен обвинител Љубомир Јовески.
„Јавнообвинителската функција постои за да се почитува законот, да се поддржува системот и неговата ефикасност, а не обратно. Секоја злоупотреба треба да биде соодветно санкционирана и одговорност за секое незаконито постапување мора да има“,
вели Муареми.
Комисијата за утврдување на дисциплинска одговорност вчера донесе одлуки за трите обвинителки. За Русковска Комисијата одлучи да му предложи на Советот на јавни обвинители таа да биде разрешена, Трајчева да биде казнета со намалување на месечната плата за 30 отсто, додека Јосифоска е ослободена од одговорност.
Предлогот да се поведе дисциплинска постапка го даде републичкиот обвинител Љубомир Јовески, кој дополнително ја суспендира Русковска.
Поранешната шефица на ОЈО ГОКК вчера во изјава за „Макфакс“ рече дека дека не смета оти е поразена со предлогот на дисциплинската комисија за нејзино разрешување и порача дека ќе се бори до крај.
„Ќе се борам до крај со сите средства“,
вели Русковска додавајќи дека одлуката била донесена одамна, уште кога таа била на сослушување во Обвинителството.
Претресот од УФП од страна на ОЈО ГОКК беше извршен на 18 јули лани и со него се чини дека ескалираше антагонизмот помеѓу Русковска и тогашниот директор на Управата, Арафат Муареми.
Муареми тогаш јавно обвинуваше за незаконит претрес и најави и кривични пријави против трите обвинителки.
Тогаш, по налог на Јовески беше извршен и надзор, по што од Јавното обвинителство излегоа со соопштение дека констатирале пропусти во постапувањето при претресот во УФП, меѓу што посочија и дека во барањето за претрес до судот што го поднеле обвинителките било наведено дека има основи на сомнение за сторено кривично дело, а во списите од предметот имало само анонимна кривична пријава.