На прес-конференцијата во Загреб, хрватски новинар го праша Османи дали ДУИ ќе бара федерализација ако пописот покаже поголем процент на Албанците од претходно
„Со Охридскиот договор се овозможи создавање на држава на еднакви заедници и на еднакви граѓани и од тој процес нема враќање назад… Можно е само надоградување во смисла на продолжување на евроатланскиот пат на државата“.
Вака, министерот за надворешни работи, Бујар Османи, одговори денеска на новинарско прашање во Загреб, за тоа дали ДУИ ќе бара федерализација на Македонија, доколку пописот покаже дека процентот на Албанците во земјава се поголем.
„Доколку резултатите од пописот на населението, во процентуална смисла, не се совпаѓаат со последниот попис, што ќе преземете како политичка партија на која припаѓате? Дали, ако процентот на Албанци во Македонија се покаже повисок ќе барате федерализација на Македонија?“, беше прашањето од хрватски новинар до Османи.
Османи, кој е во работна посета на Хрватска, на прес- конференцијата со неговиот хрватски колега, Горан Грлиќ Радман, рече дека земјава има развиено автентичен модел на регулирање на меѓуетничките односи кој може да служи како модел за земјите од поблискиот регион, бидејќи со Охридскиот договор се овозможи создавање на држава на еднакви заедници и на еднакви граѓани и од тој процес нема враќање назад.
„Можно е само надоградување во смисла на продолжување на евроатланскиот пат на државата. Пописот е планиран за годинава, точно е дека подолг период нема попис на населението кај нас. Кај нас пописот не е само статистичка операција туку е и политичка операција, бидејќи според Уставот правата на заедниците произлегува од процентот на застапеноста на заедниците. Затоа е важно да се создаде законски кредибилен процес во кој никој нема да се сомнева и убеден сум дека новото законско решение е кредибилен процес во кој сите ќе имаат доверба и ќе ги прифатат резултатите“,
одговори Османи.