И шефот на дипломатијата денеска порача дека јуни е најдобрата шанса за почеток на преговорите. Според него, се наоѓаме на критична точка кога би можел да се загуби кредибилитетот на процесот на проширување и затоа сега е време за делување
Се надеваме дека навистина во јуни ќе дадат поддршка да го направиме следниот чекор во интегративните процеси на Северна Македонија, рече денеска премиерот Зоран Заев зборувајќи за спорот со Бугарија и евентуалното тргање на ветото за почеток на пристапните преговори со ЕУ.
Заев наредната недела треба да се сретне со бугарскиот премиер Стефан Јанев на некој од граничните премини за да ја прими најавената донација на вакцини, но очекува да се договорат и за дополнителни средби за изнаоѓање решение за спорот.
„Очекуваме следната недела да направиме прва средба на граничниот премин. Кабинетите сè уште договораат, ќе видиме дали ќе се потврди од двете страни за да преку Црвениот крст се донираат 50 000 вакцини. Овде верувам дека ќе договориме средба помеѓу нас премиерите, министрите, за да работиме на деталите на решението. Како што реков ова е билатерално прашање, две пријателски земји треба да покажат трезвеност и рационалност во името на пријателството, на младите луѓе, на двата братски народи и да го најдеме решението за да може конечно после 16,5 години Северна Македонија да го направи следниот получекор – прва меѓувладина конференција“,
рече Заев.
Премиерот најави дека денеска ќе разговара и со претседателот Стево Пендаровски, кој треба да се врати од заедничкото патување со бугарскиот колега Румен Радев.
И шефот на дипломатијата, Бујар Османи, вели дека двете земји ќе продолжат со конструктивен однос за да се врати довербата и очекува комуникацијата во наредниот период да се интензивира.
„Јас останувам на ставот дека во наредниот период, јуни ја дава најдобрата шанса за почеток на преговорите, пред тоа остануваат уште две недели за да се надминат разликите. Има сериозен ангажман на португалското претседателство, знаете и со конкретниот предлог којшто ние го проценивме како добра основа за надминување на разликите. Сметаме дека португалскиот предлог ги адресира сензитивностите на трите страни, нашата страна, бугарската страна и на земјите членки коишто очекуваат дека преговарачкиот процес нема да биде контаминиран со билатерални прашања и дека тоа може да биде добра основа за надминување на разликите“,
изјави денеска Османи.
Министерот смета дека алармот е подигнат дека регионот стига до критичната точка на губење на кредибилитетот на процесот на проширување, но и дека истото го сфаќа и Бугарија и сите земји-членки на унијата.
„Очигледно времето за делување е сега. Не сакам да ги кренам очекувањата на граѓаните, минатото покажа дека и покрај тоа што имавме перфектно досие за започнување на преговори и станавме тест за кредибилитетот на процесот, очигледно ова прашање зависи од многу внатрешни динамики во земјите-членки, но нашето е да бидеме упорни. Имаме обврска добиена од граѓаните дека земјата ќе ја внесеме во ЕУ“,
нагласи Османи.