Советот за безбедност на ОН има 15 членки, од кои пет постојани кои имаат право на вето
Русија ја блокираше американската резолуција со која се осудува руската анексија на четири украински региони во Советот за безбедност на Обединетите нации.
Русија како постојана членка на СБ на ОН стави вето, а воздржани беа Кина, Бразил и Индија.
Амбасадорката на Соединетите Американски Држави во ОН, Линда Томас Гринфилд на почетокот на седницата рече дека американската резолуција е „токму за што е создаден Советот за безбедност – да го заштити суверенитетот, да го брани територијалниот интегритет и да промовира мир и безбедност“.
Резолуцијата која Москва ја блокираше ја осудува Русија за „организирање нелегални т.н. референдуми (на територии) во рамки на меѓународно признатите граници на Украина“, а референдумите се прогласени за „неважечки“. Резолуцијата, исто така, ја повика Русија веднаш, целосно и безусловно да ги повлече сите свои воени сили од територијата на Украина во нејзините меѓународно признати граници.
Советот за безбедност на ОН има 15 членки, од кои пет постојани кои имаат право на вето.
Претседателот на Русија, Владимир Путин вчера ги потпиша указите со кои областите Запорожје, Херсон, Доњецк и Луганск беа припоени кон Руската Федерација. Овој потег голем дел од меѓународната заедница го оцени како спротивен на меѓународното право и ескалација на конфликтот.