Мислам дека кон крајот на неделата или почетокот на наредната, ќе имаме конкретен одговор, сè што е законски и може да се прифати – ќе се прифати. Сè друго што не може да се прифати, што треба законски измени – не може да го разгледаме во овој период. Сите барања што може да се земат предвид ќе ги прифатиме, вели министерот Шаќири
Министерот за образование Јетон Шаќири ќе прифати сè што има законска основа во однос на кратење на материјалот за матура и смета дека ќе постигне договор со средношколците кои минатата недела излегоа на протест барајќи кратење на материјалот за полагање на државна матура или укинување на еден интерен испит. Шаќири рече на оваа тема состаноци имал и денеска и дека до крајот на неделата ќе се знае дали ќе се крати материјалот за матура, што е и целта на учениците.
„Во редовна комуникација сум со ученичкиот сојуз и студентите што беа на протест. Мислам дека кон крајот на неделата или почетокот на наредната ќе имаме конкретен одговор, сè што е законски и може да се прифати – ќе се прифати. Сè друго што не може да се прифати, што треба законски измени – не може да го разгледаме во овој период. Дел од ученичкиот сојуз е во редовна комуникација со Државниот испитен центар во претходната година и известени се за сите делови што е планирано да се реализира во државната матура. Сите барања што може да се земат предвид ќе ги прифатиме“,
рече Шаќири.
Дел од годинашните матуранти минатата недела излегоа на протест пред Министерството за образование и наука (МОН) и уште еднаш од надлежните побараа кратење на материјалот за државната матура зашто, како што кажаа, тие се најоштетената генерација на која ниту една учебна година не ѝ поминала без некаков прекин.
По ова од МОН одговорија дека испитниот материјал за полагање на државна матура на средношколците кои завршуваат оваа учебна година (2022-2023) е соодветен на сите случувања околу наставниот процес што ја засегна оваа генерација матуранти.
„Испитните комисии кои ги подготвуваат прашањата, имаат предвид дека наставата повремено се организираше онлајн поради ковид-пандемијата и поради заканувачките дојави, а повремен прекин се случи и поради штрајк на наставниот кадар. Прашањата ќе се однесуваат исклучиво на најважните аспекти, податоци и информации од материјалот кој учениците го совладале во четирите години од нивното средно образование. Олеснителна можност беше дадена и пред две години, кога се одлучи наместо три екстерни и еден интерен предмет, матурантите да полагаат два екстерни и два интерни предмети, концепт по кој полагаат и годинашните матуранти“,
рекоа од МОН.